Pagannurotan ti CMS: Pagbalinen nga aktibo dagiti nataengan

[Nabulod laeng ti ladawan a naaramat iti artikulo]

Pagannurotan ti CMS: Pagbalinen nga aktibo dagiti nataengan
Ni Rudy Ram. Rumbaoa

AMMOYO kadi nga iti kaudian a panagsukimat ken panagadal, naduktalan a kaaduan iti balay a pagtaraknan [nursing homes] wenno Nursing Long-Term Facilities kadagiti nataengan ket nakaidda latta dagitoy iti agarup 17 nga oras?

Mamatika man wenno saan, adut' maibus nga oras nga awan man laeng ti ar-aramidenda. Ngem iti nasao a panagsukisok/panagsukimat ken panagadal, naammuam ditoy ti kina-importansia ti kaadda ti aktibidad wenno kina-aktibo ken ehersisyo nga agpaay koma para kadagiti nataengan ta makatulong iti panagdur-as ti agpadpada a panunot ken salun-atda, karaman ditoyen ti pannakariribuk ken depresion.

Iti nasao a panagsukimat, kalikaguman ti Centers for Medicare and Medicaid Services [CMS], nga ikkan wenno ipaayan koma dagiti nataengan iti aramidenda- no adda pannakabalinna, pagbalinen ida nga aktibo kadagiti programa wenno aktibidad a maibasar iti kabukbukodanda a kasapulan ken tarigagay.

Iti baro a pagannurotan ti CMS, masapul a mairaman ditoy dagiti nataengan nga addan iti advanced stages ti Alzheimer's tapno agbalinda nga aktibo no adda pannakabalinna.

Iti insayangkat a panagadal nga indauluan ni Dr. Ann Kolanowski, Associate Professor of Nursing iti Pennsylvania State University, naipakita ken nailawlawag ditoy no apay a kasapulan a maipaayan kadagiti nataengan ti aktibidad a makatulong kadakuada iti panagdur-as kangrunaanna ti nataengan nga addaan iti dementia.

Iti nasao a panagadal, naduktalan ni Kolanowski "a saan a gagangay ti makakita kadagiti pasiente [nataengan] nga addaan iti kapabilidad nga agtrabaho a nakatugaw wenno nakaidda lattan iti katre kas pangibusanda ti orasda nga agmalmalem."

Iti sabali a bangir, naduktalan iti 15 a nursing homes- agarup 451 a pasiente kadakuada ti napaneknekan a nakaidda latta iti katreda iti uneg ti 17 nga oras.

Kuna ni Kolanowski a rumbeng koma a mabangon dagitoy [a pasiente/residente] manipud iti pagiddaanda a katre tapno maikkanda iti trabaho ken mapagbalinda nga aktibo saan laeng nga iti maited kadakuada nga aramidenda ngem ketdi tapno mairamanda met iti kagimongan.

Nailawlawag iti pagannurotan nga iti tunggal nataengan nga agindeg iti maysa a pasilidad ti nursing care homes: maited koma kadakuada a kas indibidual dagiti aktibidad basar iti naglabas nga ekspiriensada, ti pisikal a kasapulan, ti pagay-ayatda nga aramiden wenno hobbies ken dadduma pay a makatulong a mangitag-ay iti kapabilidadda nga aramiden ti maysa a banag.

Kuna ti CMS, aramiden koma ti amin a pamuspusan tapno awan ti masayang nga oras para kadagitoy [a nataengan].

Kasapulan met ti ehersisyo:
Iti rekomendasion ti National Institutes of Health [NIH], masapul nga agpadpada nga adda ehersisyo dagiti "caregivers/carepartners ken nataengan"- ta makatulong daytoy para iti salun-atda.

Ngem pinatigmaanan ti NIH dagiti caregivers/carepartners a masapul a mamatida ti pagbanagan ti ar-aramidenda, nasken ti rialistiko iti ekspektasionda.

Kuna pay ti NIH a nasken ti panagtalek iti tunggal maysa [iti nagbaetan ti caregivers/carepartners ken nataengan] tapno mabangon wenno in-inut a magutigot dagitoy a magna, kas maysa nga ehemplo ti ehersisyo.

Inlawlawag pay ti NIH a mapadur-as [para kadagiti nataengan ti pudno nga anag ti aktibidad nga aramidenda] ti salun-at saan laeng a dagiti nataengan ngem karaman payen dagiti mangiturturong kadakuada. Ngem kuna ti NIH a masapul a tsek-apen a kanayon dagiti caregivers/carepartners ti kinasalun-at dagiti nataengan tapno mapasingkedan nga awan ti agbalin a problema dagitoy iti tiempo ti ehersisyo. Kainuman ngarud dagiti medical personnel.

Nasaysayaat pay no agwaywayas dagiti nataengan kadagiti aramidenda ngem masapul ti superbision tapno mapaneknekan nga awan ti rumbeng a pagdanagan wenno pakairisguan ti salun-atda.*