Agballigi ngata Dagitoy Experimental Drugs para iti Alzheimer's Disease?

[nabulod laeng ti ladawan a naaramat]

Agballigi ngata Dagitoy Experimental Drugs para iti Alzheimer's Disease?

Ni Rudy Ram. Rumbaoa "Iti umuna a gundaway, ipakita iti experimental drug a lapdan wenno isardeng dagitoy nga agas ti panagprogreso ti Alzheimer's disease babaen iti baro a wagas: Waraen ti protina ti nagkalatkat ken nagbangen iti utek ti biktima." MAKAPNEK ti nagbalin a resulta manipud iti agas a maawagan iti "Rember." Ti agas ket partuat ti Tau-Rx Therapeutics a nakabase idiay Singapore. Dakdakkel ken naipalawa ti naisayangkat a panagadal, ket babaen iti ipakita ti resulta, adda pagsayaatan a pakausaran ti nasao a medisina iti masangnguanan nga aldaw. Kuna ni Marcelle Morrison-Bogorad, direktor ti Alzheimer's research iti National Institute on Aging, a daytoy ti kaunaan ken positibo a resulta a nakitana iti panangisardeng ken pananglapped ti panagkapsut ti panunot. "Di nakapappapati, ngem agpayso!" Innayon ni Morrison-Bogorad. Pinundoan iti nasapsapa a gundaway ti Federal Agency ti panagsukisok. Ti panagkalatkat ken panangbangen ket buklen iti protina a maawagan iti "tau" ken tumaud daytoy iti uneg ti nerve cells. Kadagiti naglabas a dekada, impamaysa dagiti sientista a nagadalan ti nagduduma a klase ti protina- maysa ditoy ti "beta-amyloid," agporma a kasla sinankawit ken mangpataud iti pigket iti ruar ti selula- ngem awan pay ti napartuat nga agas para iti daytoy a klase ti protina. Ti medisina ket addan iti maikadua iti tallo a tukad iti pannakapasayaatna, ngem ad-adda nga ipamaysa dagiti sientista ti kangrunaan a pannakaagas ti tao gapu iti enormiya ti sakit a mabalin a pagsagabaaan ti 26 a milion a tattao iti intero a lubong. Iti agdama, adda laeng uppat a klase ti agas wenno medisina a para iti Alzheimer a mangnam-ay/mamagkalma iti simtomas ti utek. Insingasing ti hepe ti Tau-Rx Claude Wischik, maysa a biologist iti Universidad ti Aberdeen ti Scotland ken maysa kadagiti kabayaganen a nagsukisok ken nangadal iti maipanggep ti "tau tangles," a kunana, waraen ti Rember dayta a panagkalatkat wenno panagbangen. Iti panagadal, adda agarup 321 a pasiente ti nakipaset/nakiparisipar iti daytoy naisayangkat a panagsubok. Naited kadagitoy ti maysa iti tallo a dosis wenno kantidad ti droga a rumbeng a masurot iti panagagas ti Rember ken dummy capsules wenno replika ti nasao nga agas/medisina. Maipauneg ti mamitlo iti maysa nga aldaw. Adda ramen dagiti nangato a dosis ti kapsula a mamagtalinaed a napigsa ken agtultuloy latta ti panagtrabaho dagiti mangipauneg iti nasao a medisina, idinto a nababa ti dose ken mangpataud iti rikna a panagkapsut ken kumaro ti sakit ti pasiente ti replika nga agas. Nupay kasta, makatulong ti nagtengnga a dosis kas ipaneknek ti rukod ken score ti panagawat ti panunot. Iti sabali a bangir, napukaw dagiti tattao nga agus-usar iti placebo ti maipagarup pito a porsiento ti panagtrabaho ti utekda iti uneg laeng ti innem a bulan. Kadagiti madama a maag-agasan, saan a kimmapoy ti panunotda. Ket kalpasan ti maysa a tawen, agtultuloy ti panagkapsut ti panunot ti grupo nga agipapauneg iti placebo no maidasig kadagiti agus-usar iti mid-level dose ti Rember. Iti uneg ti sangapulo ket siam a bulan, naduktalan a saan a maibilang a pasiente ti Alzheimer dagiti nagusar iti Rember. Iti naisayangkat a panagsubok, adda nakasagana a dua a brain scans a naipaay iti agarup apagkatlo kadagiti partisipante. Ipakita ti brain scans nga aktibo ti droga iti lugar ti utek kangrunaan ti naapektaran iti "tau tangles." Ngem imballaag ni Wischik a saan daytoy a "suggestive data," ken awan pay ti naan-anay a pammaneknek. Iti nasao a panagsubok, saan pay a nakasagana a maawat ti kangrunaan a kemikal/ramen ti Rember a maipagarup a rimmuaren ken nakita iti sabalisabali a langa ti pormulasion iti agas a naaramat idi tawen 1930's para iti Chronic Bladder Infections [CBI]- ti "Methylene Blue." Saan a nagarisgaran ti Food and Drug Administration [FDA] a nagadalan ti kinatalged ken kinaepektibo ti agas. Ken saan nga iti pormal a panagadal ti Alzheimer. Iti nasao a rakurak dagiti nagduduma a nagsukisok iti International Conference ti Alzheimer's Disease, napnekda iti resulta manipud ti naisayangkat a pagsubok kadagiti experimental drugs a ti kangrunaan a naipamaysa- ti pannakakita ken no kasano a tumaud ti tau tangles. Iti pannakasubok dagiti tattao nga addaan iti Alzheimer precursor ken mild-cognitive impairment, ti Allon Therapeutics, Inc., a nakabase idiay British Columbia, ti naaramat nga agas. Makita iti resulta ti tau-drug ti stark contrast ti Flurizan, a ti gagemna ket tapno bangenanna ti enzymes nga agporma iti sinankawit a maawagan iti "beta-amyloids." Kuna ti Myriad Genetics a saan a nagballigi ti nasao nga agas ket saandan nga aresgaran pay nga ituloy a pasayaaten ti Flurizan gapu iti pannakapaayda a nangpadur-as iti daytoy. Masipsiputan pay ti agbalin a resulta ti pannakasubok ti "Bapineuzumab," maysa met laeng nga experimental drug- a ti gagemna ket tapno ilista ti immune system ti pannakadalus ti utek manipud iti napigket ken sinankawit a nangbangen kenkuana. Kuna dagiti nangpartuat iti Bapineuzumab, ti Wyeth a nakabase idiay New York ken ti Irish company nga Elan Corp. PLC, nga awan ti immimbagan wenno nagdur-asan ti 240 a pasiente a nakaipakatan ti nasao nga agas. Naammuan ti gagem daytoy nga agas kadagiti pasiente ket tapno padur-asenna ti mental performance iti uneg ti sangapulo ket walo a bulan. Ngem naduktalan a maipagarup a makatulong ti agas iti innem a pulo a porsiento kadagiti tattao iti panagadal nga awanan iti gene ti namagkaro ti sakit nga Alzheimer, kas pammati dagiti sientista. Dinayaw ken impasindayag ketdi ti kompania iti kinaepektibo ti agas kadagiti sabsabali a pasiente, ngem nagamkanda ti mabalin ken posible a dakes nga ibunga [side effects] ti agas. Adda sangapulo ket dua a klase ti kaso ti panagbussog ti utek a timmaud kadagiti nagusar iti Bapineuzumab, ngem awan iti grupo a nagusar iti placebo. Ti panagbussog wenno panagletteg ket maigapu iti bassit a simtomas, ngem iti ruar, degdeganna ti mapataud a side effects. Kadagiti pasiente a nagipauneg iti Bapineuzumab, mamindua wenno ad-adu pay a daras ti nariknada a naidumduma no maikompara kadagiti pasiente a naikkan ken nagipauneg iti dummy drug ti nakarikna iti side effects daytoy. Kas koma iti kaso ti anxiety, adda 11 a porsiento kontra iti 4 a porsiento ti placebo; paranoia, 7 a porsiento kontra iti maymaysa. Nagreklamo dagiti dadduma a pasiente gapu iti panagsarua, nangato a presion ti dara, panagbaba ti timbang ken agalenda ti sakit iti likudda. Nairakurak nga adda daksanggasat a tallo a pimmusay manipud kadagiti 124 a pasiente a nagipauneg iti Bapineuzumab, ngem awan ti pakainaiganna iti nasao a droga. Maysa met ti pimmusay gapu iti neumonia ken dua a sabsabali pay gapu iti kakaro ti Alzheimer's Disease. Iti maudi a tukad ti pannakasubok ti Bapineuzumab ti Wyeth ken Elan Corp., adda maipagarup nga 4,000 a tattao ti makipaset.