SANGAPULO a minutos: Daytoy ti masansan a maited a tiempo ken orasmo iti pannakisarita iti doktor. No pasiarem ti maysa nga internist, pediatrician wenno espesialista, kadagita a tiempo ti pannakisarita iti doktor a kasapulan met ti mangngagas a denggen dagiti kayatmo nga ipulong wenno iyasug kenkuana, ti maikeddeng nga aramidenna, ken ti pannakailawlawag a husto ti rekomendasion ti pannakatamingmo.
Tapno maaramid iti kaaduan a tiempo, uray iti emergency room, nasken a nakasaganaka. Agsaludsod iti doktor tapno maammuam ti direkta a sungbatna. Ti doktor ket obligado a mangammo dagiti napudno a pakaseknam. Kayatna ngarud a sawen a maisayangkat ti ad-adu pay a pannakasubok tapno mapaneknekan a saan a pagduaduaan dagiti isungbatna, napinpintas no maamuan ti opinyonna pakaseknan iti simtomas ken ti panakaagas ti an-anayem.
Kuna ti maysa a surgeon babaen iti bukodna nga ekspiriensa, naduktalanna nga adda dagiti kangrunaan a masaludsod mainaig kadagiti maitudo a simtomas ken situasion a maisupadi iti agbalin a resulta iti pannakatamingmo- ket daytoy ti makatulong a mangsalbar iti biagmo. Dagiti sangapulo a kondision ken saludsod a rumbeng ken nasken a saludsoden iti doktor:
1. UT-OT ITI LIKUD KEN KADAGITI NAGSUSUOPAN-
Dagitoy a tumaud nga ut-ot ket masansan a resulta ti panakadesgrasia wenno panaglakay/panagbaket. Ngem no dadduma, ti ut-ot a marikna nga agbayag iti bagi ket adda iparparangarangna nga adda dakes a mapaspasamak kenka. Dimo koma baybay-an. Adda dagiti makapatay a sakit a kaarngi daytoy a sakit, ket importante unay a malapdan ti panagramram ti ut-ot iti kabiitan a panawen. No masansan a maka-ekspiriensaka iti patinayon a panagut-ot iti likud wenno kadagiti susuopmo, saludsoden iti doktor: "Malaksid iti arthritis wenno dagiti dunor, ania kadi ti makagapu iti panagut-ot ti likud ken dagiti susuopko?"
Mabalin a dagitoy ti posible a makagapu:
*Prostate Cancer wenno dadduma a klase ti problema a sakit iti tian- dagiti prostate, pancreatic cancers ken kidney stones ket pataudenna ti nasakit ken naut-ot a likud, masansan a kasla dumuyok ken kasla iwaen ti kutsilio ti marikna iti nagtengnga wenno iti baba a paset ti likud. Dagitoy a panangsukimat ti puon ti sakit ket saan a maitudo nga isut' gapu ti panagut-ot ket malibtawan no dadduma gapu ta kaaduan kadagiti tattao nga agsagaba iti kastoy ket saan a mapakuyogan iti sakit ti likud nga addaan iti kanser wenno bato, daytoy ti rason a dida pakadanagan ti marikna nga ut-ot. Adda dagiti maitudo a panagsukimat ti puon ti sakit mairaman ditoy ti PSA wenno prostate specific antigen tests ken CT scans. Saludsoden iti doktor no ania ti kasayaatan kadagitoy a pagsubok, ken no mabalbalin, iyuman iti maysa nga espesialista.
*Osteoporosis- ti panagingpis ken panagkapsut dagiti tultulang ket masansan a maigapu iti kinalakay/kinabaket, ngem mabalin metten a tumaud/mapasamak daytoy a sakit kadagiti agtutubo. Mangrugi iti bassit a panakailigis/bullo/tukkol iti duri [spine] ken dadduma pay a paset ti bagi a mamataud iti ut-ot. Ti bone density screening ket saan a nasakit a pagsubok, maysa a noninvasive test a masansan nga irekomendar ti doktor para kadagiti post-menopausal a babbai wenno kadagiti pamilia nga addaan iti pakasaritaan iti daytoy [family history]. Ti gagangay a panagagas ket karaman ti pannakaiyadu iti ipauneg a calcium ken bitamina D kadagiti taraon, kasta metten iti medisina nga Fosamax, Actonel ken Boniva.
*Lyme Disease- masansan a masarakan ti ut-ot kadagiti nagsusuopan nga adda kannayonna nga "bull's eye rash." Agpangato agingga iti 25 a porsiento dagiti biktima ti Lyme disease a saan nga agparang ti bull's eye rash ken dida ikankano a ti ut-ot ket adda koneksionna kadagiti nagsuopan. Ti Lyme ken masansan a mayakar babaen iti deer ticks. No maduktalan iti nasapa, nalaka a maagasan ti Lyme disease babaen iti antibiotics. Ngem no maduktalan daytoy iti mabayag, ti panagagas ket kompleks ken adda epektona a nakadadanag iti bagi.
*Lupus [systemic lupus erythematosus, wenno SLE]- nadagsen ken mabayag daytoy a sakit ken agparang iti porma a kas nangisit a "kulibangbang" a gagatel iti rupa, a sarunoen iti nakaut-ot-ot a nagsusuopan. Iti panangsukimat ti puon ti sakit [diagnose], maala ti dara tapno maeksamen ken maadal ti simtomas ken pakasaritaan ti nagbalin a sakit ti maseknan. Mairaman ditoy ti anti-inflammatory medicines a kas pangagas iti daytoy a klase ti sakit.
*Panagbusso/panagdakkel dagiti nagsusuopan- mabalin pay a daytoy ket senial ti impeksion iti nagsusuopan. Masansan a maala ti danum manipud iti nagsuopan tapno masubok. No adda impeksion kas iti staph, maireseta ti antibiotics nga agas. Laglagipen: agbalin a makapatay ti impeksion no saan a madagus a mataming. Saan koma nga urayen a dumakkel ken agut-ot dagiti nagsusuopan.
*Bone Cancer- no dadduma, tumaud ti ut-ot gapu iti bone cancer kasta metten kadagiti kanser a nagwarasen iti tultulang. Ti duri ken paragpag ti masansan a pakariknaan ken pakakitaan iti daytoy a sakit. Ngem kadagiti tattao nga addaan iti kanser iti nagduduma a paset ti bagi ket alistona a maala ti bone cancer.
2. SAKIT TI ULO-
Tinawagan ni Lakay Mundo [saanna a pudno a nagan], 57, ti kabsatna a babai tapno ibagana ti sakit ti ulona. Naekspiriensana daytoyen idi, iti daydi a rabii nga ipapanna iti kuartoda nga agasawa- nasakit nga ulo ti sinagabana. Timmawag iti kabigatanna ti kabsatna a babai tapno ammuenna ti kasasaad ni Lakay Mundo ngem dina ma-kontak. Tinawaganna ti asawa ti Lakay iti trabahona. Naibaon ketdi ti maysa a karrubada tapno ammuenna no ania ti mapaspasamak iti Lakay, ket ditoy a naduktalanna a nagpakleb iti datar a natay ti Lakay. Nasdaaw ti naibaon. Pimmausay ti Lakay iti "lethal brain aneurysm."
Maagasan ti "aneurysm" no masapa daytoy a maduktalan. No makaekspiriensaka iti di mailawlawag, agawan-agadda a sakit ti ulo wenno agsakit ti ulo a kasla dumuyok ti ut-otna, nasken nga agpakitaka iti doktor ket saludsodem kenkuana: "Daytoy ti karanggasan a panagsakit ti ulok iti intero a panagbiagko- daytoy kadi ket aneurysm?"
Adda sumagmamano a klase ti sakit ti ulo: "cluster," "sinus" ken "migrane." Ti aneurysm ket saan a maibilang a sakit ti ulo; daytoy ket makuna nga abnormal a panaglapad wenno panagdakkel dagiti blood vessels. Itden ti aneurysm ti naut-ot ken ti mailawlawag a panagsakit ti ulo no agbettak dagiti blood vessels ken no sumrek ti dara iti utek.
Makuna a tumaud ti aneurysm gapu iti depekto ti pannakayanak wenno tumaud daytoy iti bumaybayag bassit. Natakutan nga adda lima a porsiento iti papulasion iti addaan iti klase ti aneurysm iti utek ket mabalin a bumtak daytoy iti ania man nga oras. No agut-ot ti ulo a sarunoen ti panagrurusok ken panagsarua, panagkissiw wenno dadduma pay a klase ti neurological a simtomas, dagdagusen ti mapan iti ER wenno tumawag ti tulong.
3. TRANGKASO- kuna ti kaaduan a tattao, ti trangkaso ket maysa laeng a mangriribuk wenno panggulo iti salun-at. Ngem para kadagiti immune-compromised, dagiti nadagsen ken mabayag a sakit, ken depende iti tawen- makuna a makapatay ti trangkaso.
Tunggal tawen, adda 36,000 nga Amerikano ti matay gapu iti trangkaso wenno iti komplikasion, ken nasurok nga 200, 000 ti mayospital. Ngem kasano nga ammon no adda kenka daytoy?
Aggapu ti trangkaso iti maysa a virus ket masansan nga agbayag daytoy a sakit manipud tallo agingga iti uppat nga aldaw. Dagiti simtomas a pagilasinan ti kaadda ti gurigor, panaglammin, ut-ot ken sakit, makapasagureng nga agong ken namaga nga uyek. Ngem no dagitoy a simtomas ti agbayag iti sumagmamano nga aldaw nga awan ti pagpiaanna, kasapulan nga agpakonsulta ken saludsoden iti doktor: "Nakabutbuteng ti marikriknak. Ania ti ammom a rason no apay a mapaspasamak kaniak daytoy?"
4. KANSER TI SUSO-
Narigat a mabasa ti napalabas a mammograms ni Lorie Levy gapu iti kinapuskol/nasedsed/padapada ti susona. Pimmusay ti ina daytoy iti breast cancer, ket ni Lorie, agtawen iti 49, madanagan ken mariribukan ket kayatna a maagasan koma daytoy. Nupay kasta, agparang a kasla normal dagiti agsumbangir a suso daytoy. Dinamagna: "Kayatko a ma-ultrasoundnak uray no negatibo ti resulta ti mammogramko?"
Agpayso, adda masuspetsa a bukol nga ipakita ti ultrasound a malibtawan a mabasa ti mamaogram. Nakompirma babaen iti sumagmamano a panagsubok nga adda cancer daytoy. Ita, kalpasan iti lima a tawen, ammo ni Lorie a naala ti nagtaud a tumor kadagidi immuna a tukad ti sakit, naawatna ti umisu a pannakaagas ket ita, maysan a cancer-free.
Ti maadaltay' ditoy ket saanna a kayat a sawen a nasaysayaat ti ultrasound ngem iti tradisional a mammograms. Ti kinapudnona, maysa ketdi a kombinasion dagitoy dua a panagsubok iti nangted iti nalawag ken nasayaat a resulta. Ti mammography ket maysa kadagiti maar-aramat pay laeng a "screening" kasta met iti breast ultrasound ken MRI, ti ad-adda a mangpapintas ti epektibo ti screenings ken diagnosis.
Kuna ni Freya Schnabel, MD, chief of breast surgery iti Columbia University Medical Center, New York City, "Saan a maymaysa ti pakausaran ti Breast Cencer Screening. Rumbeng a marukod iti tunggal tao- kas iti pasiente nga adda iti risgo ti kanser ti suso ken ti kinapuskol/nasedsed/padapada a suso."
Ti mammography ket saan a makuna a sensitibo a pagsubok kadagiti babbai nga addaan iti kinapuskol/nasedsed/padapada a suso, ken matulong ti ultrasound iti nayon a pagsubok. No ti babai ket asideg a mairisgo iti daytoy a sakit, ti MRI ti kasapulan ken maiparbeng a pagsubok. Ngem nangina ti magastos.
Kasarita ti internist wenno gynecologist sakbay a maisangkat ti mammogram maipanggep iti situasion ti salun-atmo ken saludsoden ti maipanggep iti ultrasound. Iti kasta, agpadakayo a makaibaga no manayonan pay ti sabali a pagsubok. Ket sakbay a ma-biopsy ka, kiddawen ti resulta dagiti naglabas a pagsubok para iti makuna a "second opinion."
5. SAKIT ITI BARUKONG- no makaekspiernsaka iti gulpe a panagsakit iti barukong, sa in-inut a lumabas a mapan iti akinkannigid a takiagmo, adda panaglamiis, panagsidduker ken panagdanag, mabalin a mapasamak kenka iti panakaatake ti puso. Dagitoy a simtomas ti ad-adda a makita ken marikna dagiti lallaki ngem dagiti babbai, a ti atake ti puso ti masansan a di pannakasukimat ti puon ti sakit.
No awananka kadagitoy maibaga a simtomas ngem masansan a makaekspiriensaka iti panagsakit iti barukong iti akinkannawan a paset ti barukong, saan unay a naut-ot, adda riknam a nakurang ti panagangesmo [SOB wenno shortness of breath], heartburn, panagbubussog ti tian a di pumanaw, lalaki wenno babai man, tumawag nga insigida iti ambulansia wenno kasarita ti maysa a tao nga ammona ti agmaneho ta itaraynaka iti kaatsigan nga ospital- iti ER ken saludsoden iti doktor: "Mapasamak kadi kaniak ti atake ti puso? Ditay' koma agtaktak- mabalin kadi a mangala ken masubok ti enzymesko?"
No ti piskel iti puso ket saan a marasionan iti tumutop a dara, ti maperdi a piskel ket ruk-atanna dagiti enzymes nga agturong iti pagayusan ti dara. Mabalin a maisayangkat ti sabali a pagsubok iti ER. Ngem ti simple a panagala iti dara para iti pagsubok ket alisto a marukod ti bilang dagitoy nga enzymes ket nalawag nga ipakita ti resulta a mapaspasangasangan ti atake ti puso.
6. ATAKE [STROKE]- kalpasan ti rugi/pagdamuanan [onset] ti atake, adda tallo nga oras nga opurtunidad nga agtomar iti clot-busting drugs a mangsalbar iti biagmo. Agparang dagiti simtomas ti atake iti nagduduma a paset ti bagi, ngem kaaduan nga atake ket tumaud iti utek. Dagiti pagsenialan kas iti gulpe a narigat nga agsao/agbalikas wenno panakariribuk ti panunot, saanna a maaramat dagiti takiag, saka, ken paralisado ti rupa- masansan iti maysa a bangir. No dadduma, tumaud ti atake iti kalkalainganna [mild] ken awanan daytoy iti simtomas, ngem nupay kasta, importante ti panakatamingna. No kas pagarigan nga iti panunotmo dumteng ti panagatake kenka, saan nga agpamayang, tumawag iti ambulansia wenno kasarita ti maysa nga am-ammom ta umaynaka itulod iti ER. Saludsoden iti doktor: "Adda kadi atake a mapaspasamak kaniak? Kasano ti tinomarko nga clot-busting drugs?"
Tunggal 45 a segundo, adda latta mapasamak nga atake uray sadino a paset ti lubong. Ti "Clot-busting medication" a maawagan pay iti "tissue plasminogen activator [TPA] ket runawenna ti napalet/nagtitipkel a dara tapno pabassitenna ti perdision ken lappedanna ti tumaud a simtomas. Ngem laglagipen: maaramat laeng daytoy a medisina iti umuna a tallo nga oras ti panakaatake. No iti panunot ken bukod a pammati a nasaysayaat a maitarayka iti ospital- aramidem. Wenno kasapulam ti medisina a para iti kastoy a situasion, dumawat. Ken siguraduem a maeksamenka tapno ammom ti rason no apay a mapaspasamak kenka daytoy.
7. SAKIT ITI TIAN [ABDOMINAL PAIN]
Narikna ni Roberto, 54, ti saan a nasayaat a kasasaad ti tianna iti maysa a rabii. Iti sumuno a bigat, uray no saan a napudot ti temperatura ti bagina, agpigpigerger latta. Gapu iti daytoy a situasionna, immanehoan ni Baketna tapno agpakonsulta iti doktorna, ngem di masarakan ti doktor ti rason ken puon ti sakit isu nga imbaonna daytoy iti lokal nga ER.
Ngem idi nakasangpetda iti ER, awanen ti marikna ni Roberto a simtomas malaksid laeng iti panakabannog wenno panagkapsutna ken di makatalna. Normal ti rukod ti temperatura ti bagina, ken nagserdeng metten nga agpigpigerger. Kapilitan nga imbaw-ing dagiti ER personnel ti atensionda kadagiti sabali a pasiente nga addaan iti nakarkaro a sakit. Ngem pagammuamta di makatalna ni Roberto ket makarikna iti nakaro nga ut-ot. Limmagto ti rukod ti temperatura ti bagina iti 104, ket gapu iti daytoy, ti kaso ni Roberto ti nakaalertuan dagiti medical personnel.
Maysa nga ER doktor ti nangeksamen ken ni Roberto, intalmeg ti doktor ti tian daytoy, ngem awan ti mariknana a sakit. Mariribukan ti doktor gapu iti nangato a gurigor. Dagus nga imbaga ti doktor a maisayangkat ti abdominal CT scan with contrast [panagsisilpo], maysa a klase ti rayo-X [x-ray] a mangipakita saan laeng a dagiti tultulang no di pay amin nga organo ti bagi. Imminum ni Roberto iti dye [pangtina] tapno makita ti sibubukel a GI tract daytoy. Makita ditoy nga agsagsagaba ni Roberto iti apendisitis ket naduktalan a ti apendix daytoy ket nadislokasion iti orihinal a lugarna. Maadal iti daytoy nga ekspiriensa ket saludsoden iti doktor: "Kasapulan kadi ti abdominal CT scan ken dadduma pay a pagsubok sakbay a mapanak iti operating room?"
Nasorpresa ti doktor iti naduktalanna nga apendisitis gapu ta saan met nga agalen ni Roberto ti ut-ot a masansan a tumaud iti akinbaba nga akinkannawan a paset ti tian. Ket no saan koma a naisayangkat ti pagsubok iti panagsisilpo [contrast], mabalin a bimtak ti apendix ket ad-adda nga iyegna ti makapatay a kasasaad. Dagus ngarud a naipan ni Roberto iti surgery room para iti emergency appendectomy.
Tunggal tawen, nasurok nga 250,000 nga Amerikano ti agsagaba iti apendisitis. Ket kaaduan kadakuada iti saan nga umno ti pannakaduktal ti puon ti sakit [misdiagnosed]. Dagiti dadduma a serioso a pangmedikal a maitulad nga apendisitis a kondision kas ovarian cyst, tubal pregnancy, sumagmamano a porma ti diverticulitis [maysa a klase ti panagletteg/panagbussog dagiti bagbagis] ken makaakar a seksual pelvic inflammatory disease [PID].
Dagiti dadduma pay a kaarngi ken makagapu: dadduma a panagletteg/panagbussog manipud iti ulser, sakit ti gallbladder wenno liver abscess- ken uray pay ti sakit ti kidney ken colon cancer. Isu a ti kasayaatan nga aramiden sakbay a maisayangkat ti maysa nga operasion wenno surgical procedure, penken nga umuna ti doktor ken maisayangkat amin a kasayaatan a pagsubok a makatulong iti panangtakkuat ti puon ti sakit.
8. PANAGPASNGAY [CHILDBIRTH]- awan ti makuna nga agplano para iti maysa nga "obstetrical emergency," ngem mapasamak latta daytoy iti inaldaw. No dadduma agbalin a komplikasion ti panagpasngay nangruna iti biang ti ina ken maladaga.
Ket no masikogka ken kalikaguman a maipasngay ti anakmo iti nasayaat a pannaripato, damagen iti obstetrician: "Asino ken ania a klase dagiti doktor iti ospital ti rumbeng a mangtaming kadakami iti anakko no inkaso nga adda emerhensia a panagpasngayko?"
Anesthesiologists- isuda ti matungpal nga agisurat iti agas ken agited iti anesthesia kabayatan iti operasion. Kanayonda nga adda iti uneg ti operating room no inkaso a maisayangkat ti cesarean section wenno premature labor ken dadduma pay a serioso a komplikasion. No adda panakabalinna, penkem nga umuna ti kanayon a kaadda ti anesthesiologist iti ospital.
Pasiente met dagiti kaipasngay a maladaga, ket rumbengda a maipaayan iti nasayaat a pannakataming. Kasta met a kasapulan dagiti maladaga iti pediatrician a nakasagana nga agnanayon. Mabalin a kasapulan dagiti maladaga iti emergency treatment kalpasan ti panagpasngay ti ina, uray pay no naipasngay ti maladaga iti nasayaat a kasasaad.
Ti napintas a lugar iti ospital a para kadagiti maladaga isu ti kaadda ti "neonatal intensice care unit" a nakasagana para iti pagkasapulan ti maladaga. Daytoy a pasilidad ket aramaten dagiti kaippasngay a maladaga nga addaan iti kritikal a problema. Ngarud, siguraduen ti kapintasan ken natalged a pagpasngayan nga ospital. Ngem no awan ti kastoy a kapintas nga ospital iti lugaryo, kasarita a nasayaat ti OB doktor tapno pagsaritaan ti emergency contigency plan para iti panagpasngaymo.
9. CHILD'S HEAD TRAUMA- saantayo kanayon nga adda a mangkita iti ar-aramiden dagiti annaktao. No dadduma, maitim-og ti uloda wenno matnagda. Nupay dagitoy a pannakadunor iti biang ti panagay-ayamda, minor accidents ken uray pay ti pannakaabuso dagiti ubbing ti mamataud iti pannakadadael ti mata ken utekda. Mangipakita dagitoy nga ubbing iti sabali wenno panagbaliw nga ugali ket daytoy ti senial ken makapatay a probelama ti head trauma.
No madlaw a sabali ti ar-aramiden ti anakmo iti dati nga ugalina ken kasta met a masansan a makaturturog ti riknana, dinaka ikaskaso ken mariribukan, nasaysayaat nga ipan daytoy iti doktor ken saludsoden: "Karaman kadi ti head injury wenno trauma iti ipakpakita ti anakko a simtomas?"
Tunggal tawen, adda maipagarup nga 1.4 milion nga Amerikano ti agsagsagaba iti traumatic brain injury, ket maipakita a daytoy ti kangrunaan a rason ti ipupusay ken ti kinaawan a mabalbalin dagiti ubbing ken agtutubo. Dagiti simtomas- managpanpanunun, nakaro; isuda ti mangdegdeg ti problema.
|
Maipagarup a bekkelen wenno agsardeng ti danum iti aglawlaw ti utek ken duri. Nakarkaro a serioso ti tumaud a problema no adda panagdur-as ti panagpussuak iti dara manipud kadagiti mapigis wenno madadael a blood vessels iti lugar ti utek [awaganda iti subdural hematoma]- kasapulan ngarud iti madagdagus nga operasion ti panakataming daytoy.
|
|
Ti Retinal hemorrhage [panagdara ti mata]- makita ti alisto a panagbaliwna, daytoy ti tumulong kadagiti dodoktor a mangsukimat ti puon ti sakit nga awaganda iti "shaken baby syndrome" ken manipud iti agsublisubli a panakadunor gapu iti panagay-ayam.
Dagiti dadduma a senial iti panageksamen ti doktor: panagkapuy kadagiti takiag ken gurong, wenno abnormal a panagresponde ti kiday. Masubok dagitoy babaen iti CT scan ken full eye and neurological exam. Kapintasan a salaknib? Dagiti Helmet...
10. MACULAR DEGENARATION- apektaranna ti sentro ti panagkita ken tumaud daytoy kadagiti agtawen iti nasapsapa a singkuenta anyos, daytoy pay ti kunada a "reaching crisis levels." Daytoy ti kangrunaan a sakit a makaapektar ken pagbuldingan dagiti Amerikano. Nasurok nga 10 a milion a tattao ti nasapa a napukawan iti panagkita gapu iti nasao a sakit, agarup a 200,000 ti baro a kaso iti tunggal tawen. No naduktalan nga adda kenka ti macular degeneration, kasarita ti opthamologist ken saludsoden: "Kas nangegakon, makatulong kadi dagiti baro a medisina nga Avastin ken Lucentis iti kasasaad ti matak?"
Idi Hunio 2006, rimmuar ti dua nga importante nga agas ket nagbalin daytoy a pagsasaritaan gapu iti alisto a panagdur-as ti biag dagiti pasiente. Ti Lucentis- inaprobaran ti FDA, saanna laeng a pagsardengen ti panagprogreso ti macular degeneration ngem ketdi pasublienna ti dati ken nalawlawag a panagkita. Ti Avastin- naaprobaran met daytoyen a pagagas ti colon cancer ken ar-aramaten metten dagiti opthalmologist a mangtulong iti macular degeneration. Kasarita ti doktor maipanggep iti pagsayaatan dagiti mata amangan no makatulong daytoy [ti Lucentis ken Avastin] kenka.* |
|
|
|
|
|
|
|
|
|
|
|
|
No comments:
Post a Comment