Umuna a Pasiente nga Immawat iti Aripisial nga Anguyob

[Maipakita iti operasion ti pannakimula ti aramid ti tao nga anguyob iti agtawen iti 36 a lalaki nga addaan iti kanser ti karabukob.]

UMUNA A PASIENTE NGA IMMAWAT ITI ARTIPISIAL NGA ANGUYOB
ni Rudy Ram. Rumbaoa


[Ti kabarbaro nga anguyob ket naaramid iti pannakausar ti espongha, plastic polymer tapno al-alisto ti panagdakkel dagiti selula...] 

NGAN-NGANI nagbabawi ti umuna a pasiente nga immawat iti artipisial nga anguyob para iti pangsalbar ti biag nga operasion a naisayangkat kenkuana itay kallabes.

Impakaammo dagiti dodoktor ti pagilian a Sweden ti pannakaimula ti aramid iti laboratorio nga anguyob [windpipe] ken ni Andemariam Teklesenbet Beyene, agtawen iti 36, taga-Eritrean, Reykjavik, Iceland. Bayat iti panagadal ni Beyene iti Unibersidad ti Iceland, , naduktalan kenkuana ti kaadda iti advanced cancer ken ti kaadda iti dakkel a tumor a mangbarado ti anguyob.

Imbaga ti personal a doktor ni Beyene ken ni Dr. Paolo Macchiarimi, maysa a siruhano ti Stockholm's Karolinska Institute, a nagisayangkat iti pannakaimula iti kastoy a klasena nga aparato kadagiti naglabas. Insingasing ni Macchiarimi a masuktan ti naperdin nga anguyob a naimula ken ni Beyene iti naaramid iti laboratorio.

Iti panangilawlawag ni Beyene iti Associated Press, kunana a saan pay idi a naaramid wenno naisayangkat daytoy a proseso ti operasion iti tao. Innayonna pay a no saan a maaramid, kasano ngarud nga anamonganna daytoy a klase ti operasion?

Ngem kalpasan ti pannakisarita ti personal a doktor ni Beyene iti kameng ti pamilia ni Beyene, karaman ti asawa ken dua nga annakna ti Eritrea, immannugot met la ni Beyene a maisayangkat daytoy a klase ti rebulosionario a pannakaimula ti maysa nga aparato kenkuana. Impudno ni Beyene a nagkararag ket inawatna ti kinapudno. "Maragsakanak iti resulta ti opersaion," inayonna.

Ti kabarbaro nga anguyob ket naaramid iti pannakausar ti espongha, plastic polymer tapno al-alisto ti panagdakkel dagiti selula. Daytoy nga aparato ket naus-usaren iti tear ducts ken blood vessels. Apaman a naaramid ti anguyob iti laboratorio, nausar ti bukod nga stem cells ni Beyene tapno mapartuat ti minilion a sabsabali pay a selula a mailinia ken mangkalupkop iti nasao nga anguyob. Kayatna ngarud a sawen  a mabalin nga awaten ti bagi  ni Beyene ti baro nga organo ken saannan a kasapulan iti panagipauneg iti anti-rejection medicines.

Adda metten naisayangkat a pannakaimula ti anguyob kadagiti napalpalabas a nausar ti donor windpipes ken bukod nga stem cells ti pasiente tapno makaluban ti baro a karabukob, ngem iti kaso ni Beyene, daytoy pay laeng ti kaunaan nga aramid ti tao nga organo.

Kalpasan ti naisangkat nga operasion, bantayan dagiti dodoktor ti pagprogresoan ti baro a naikapet nga anguyob iti tunggal innem a bulan agingga iti lima a tawen. Maaywanan a naimbag tapno maliklikan ti posible a panagtaud ti ania man a komplikasion, karamanen ti impeksion.