Dagiti Herbal nga Aprodisiak [Umuna iti Dua a Pasetna]

[Nabulod laeng ti ladawan a naaramat iti artikulo]

Dagiti Herbal nga Aprodisiak [Umuna iti Dua a Pasetna]
Ni Rudy Ram. Rumabaoa


ADU dagiti herbal a makuna nga aprodisiaks/aphrodisiacs ngem agtrabaho dagitoy iti sabasabali a wagas ken saan nga agpapada ti pagresultaanna. Maipauneg ti fast-acting nga herbal sakbay ti seks ken maapektaran ti maysa wenno kombinasion dagit tukad ti sexual response. Adda epekto dagitoy nga aprodisiaks/aphrodisiacs iti pisikal a bagi kas iti panagadu ti panagayus ti dara iti mabagbagi, epekto ti emosional- ti maruk-atan ti stress ken anxiety, wenno agpada.

Adda met dagiti herbal nga aprodisiaks/aphrodisiacs nga agtrabaho a napaut iti amin a paset ken sistema ti bagi. No regular a maipauneg, dagitoy nga herbal ti mangted kadatayo ti pisikal ken nakasagana nga emosion para iti mabayag a tarigagay ti pannakiseks, enerhia, pigsa ken panagtrabaho.

Ania man nga herbal ti ipaunegmo, importante a maawatan no kasano ti panagipaunegmo kadakuada no aramatem daytoy iti maximum wenno tudo nga epektibo ti pannakinaig ken ti kinatalgedna. Saan a kas iti parmaseutika, ti preparasion kadagiti herbal ket agbatay iti kinapigsa ken kinaepektibona. Maisingasing a dagiti dosages wenno ti maipalubos a maited ket saan nga standardized a kas iti ar-aramiden ti parmaseutika.

Maikabil ti etiketa iti preparasion ti herbal tapno maipalubos a makita ti impormasion mainaig ti kaadu nga ipauneg. Saan a ganaten ti mangnayon iti ipauneg iti herbal nupay adda pagsasao nga "more is better." Iti herbal, ti kinabalanse nga ipauneg ti tulbek.

Dagiti Herbal nga ipauneg sakbay ti pannakinaig para iti epekto pang-pisikal
-Kaaduan kadagiti fast-acting herbs ti mangital-o ti tarigagay a pisikal ken sexual fucntion iti agpada a lallaki ken babbai. Ehemplo ditoy ket ti gingko, cayenne, ken ginger [laya] a tumulong a manglukat iti blood vessels nga agturong iti mabagbagi ti tao. Ti panagadu ti panagayus ti dara ti mangpaalisto ti panagtangken, sexual perfomance iti lallaki ken sexual stimulation iti agpadpada. Dagiti tallo a fast-acting herbs: damiana, muira puama ken yohimbine- ti kakaisuna nga herbal aphrodisiacs a nagdalan iti pannakasukisok/pannakaadal.

Ti Cayenne Pepper [Capsicum frutescens] ket maawagan pay iti red pepper [nalabaga a sili], ken nalatak nga am-ammo kas herbal ken spice [nagasang/naadat]. No maipauneg iti ngiwat, paaduenna ti sirkulasion ti dara iti bagi. Mabalin pay nga usaren daytoy nga itapkal ken yagas iti nasakit wenno agdara a sugat ken iti agletteg. Naaramid ti cayenne pepper iti nagango, ground fruit ti nagduduma a naadat a sili. Ti aktibo a ramenna daytoy ket ti capsaicin- maysa a substansia a mangparugso ti sirkulasion ken digestion.

Magatang ti cayenne iti kita ti kapsula, concentratred drops ken tinctures. Kas aprodisiaks/aphrodisiacs, maipauneg daytoy 30 minutos sakbay ti pannakiseks. Ti dose- 10 agingga iti 15 a katedted ti tincture wenno concentrated drops, wenno 400-500 milligram [mg] capsule. Mabalin pay ti preparasionna iti sangatasa a napudot nga itsa nga ibukbok ti maysa a kutsarita ti powdered cayenne. Ti dosage- one fluid onces [1/8 a tasa] ti itsa.

Ti Damiana [Turnera aphrodisiaca] ket bassit a klase ti kayo ken masarakan laeng daytoy idiay North America. Masarakan ken agtubo dagitoy iti namaga, nadarat wenno iti kabatoan a lugar iti American Southwest kas iti kaadayo ti North Texas. Maaramat ti damiana iti agpada a lallaki ken babbai. Idiay Mehiko, naaramat nga immuna daytoy kadagiti babbai--mainum ti damiana tea sakbay ti pannakiseks. Kadagitoy a panawen, maaramaten ti damiana kas pagagas iti low libido, impeksion iti urinary ken vagina, ken menstrual problem [problema ti panagbinulan dagiti babbai]. Aramaten met dagiti lallaki a para iti kina-inutil, premature ejaculation ken prostate complains. Masansan a mailaok ti damiana iti saw palmetto kas pagagas iti kina-inutil ken problema iti prostate.

Awan ti naaramid a clinical studies maipanggep ti agbalin nga epekto ti damiana, ngem ipakita ti chemical analysis nga addaan daytoy iti ramen nga alkaloids kas iti caffeine a mangparugso ken epekto ti aprodisiaks/ aphrodisiacs. Dagitoy nga alkaloids ti mangparugso iti panagayus ti dara nga agturong iti mabagbagi ti tao ken itdenna ti increase sensitivity, ngem addaan met daytoy iti makapairita a lana a mangparugso iti genitourinary tract. Tumulong ti damiana a mangtengngel ti hormonal activity ken pagkalmaenna ti nerbio. Makarikna dagiti dadduma a tattao iti mild euphoria sumagmamano nga oras kalpasan nga agipaunegda iti damiana.

Magatang ti damiana iti kita ti kapsula, concentrated drops ken extracts. Adda ramenna a nagduduma a kombinasion ti herbal.

Sabali pay a pakaaramatan ti damiana: paruk-atanna ti dipresion, anxiety, exhaustion, panagtebbel, digestive problems, incontinence, water retention, ken mucus congestion.

Maawagan pay ti Ginger iti Zingiber afficinale. Daytoy a laya ket nagtaud manipud iti ramut ti mula a mangted iti alisto a panagrugso ti rikna. Paaduenna ti panagayus ti dara nga agturong iti mabagbagi ti maysa a tao. Magatang ti ginger iti supermarket, food store wenno sari-sari store. Magatang ti ginger iti nagango ken iti kita ti tableta, kapsula, concentrated drops, tinctures ken extracts. Masansan a maipalubos a maipauneg ti 500-1,000 mg ti nagango a laya wenno 1-2 a katedted ti tincture wenno concentrated drops.

Ti laya ket maysa a blood thinner ken saan a maipalubos a maaramat no agipapaunegka iti anticoagulant nga agas wenno aspirin.

Paaduen ti Gingko [gingko biloba] ti panagayus ti dara iti mabagbagi ti tao babaen ti panagukrad ti diding dagiti blood vessels. Para ti napintas a resulta, masapul nga agipauneg iti inaldaw. No usarem sakbay ti pannakiseks, masapul a maikaadu ti ipauneg. Ti rekomendasion nga ipauneg ket tallo a sag-60 mg kapsula wenno 30 a katedted ti porma ti likido a maitedted iti sirok ti dila. Paingpisenna ti dara ti gingko ket saan nga usaren no agipapaunegka iti aspirin wenno anticoagulant a droga.

Singasingan ti Kava Kava [Piper methysticum] ti halisinasion ken parugsuenna ti seksual. Mangipaay ti bara ken rugso iti genitalia. No mausar daytoy kas aprodisiaks/aphrodisiacs, mainum ti kava kava tea sakbay ti seks- ngem saan a nasursurok iti maysa nga oras sakbay. No agbanag a kasta, amangan no agtennag ti tarigagay iti panagturog.

Ti Muira Puama wenno Ptychopetalum olacoides, maawagan pay iti "potency wood," ket nabayagen nga inar-aramat ti Brazil ken Peruvian Indians kas nabileg nga aprodisiaks/aphrodisiacs ken nerve stimulant. Mainum ti muira puama tea iti apagbiit a tiempo sakbay ti pannakinaig. Mapataud ti itsa daytoy babaen ti panagipaburek iti danum, maukisan ti ramut ken mailaok. Mabalin a mapataud manipud iti tintura ti muira puama a mailaok iti danum. Kas iti damiana, muira puama ket masansan a mailaok kadagiti sabsabali pay nga herbal.

Dadduma pay a pakaaramatan ti muira puama kas iti menstrual cramps ken menstrual syndrome, stimulant, stomach tonic ken agas ti rayuma.

Naipatarus ti nagan a Yohimbine manipud iti ukis ti kayo a yohimbe, naberde ti bulong daytoy a kayo a masarakan idiay West Africa. Ti ukis ti yohimbe ket mabalin nga ipauneg, angoten, puoran, irasras iti bagi ken itsa--nabileg ti aphrodisiacal propertiesna. Nadiskobre dagiti nagsukisok nga addaan ti yohimbe iti aktibo a ramen a maawagan iti "yohimbine hydrochloride," maysa a kita ti crystalline alkaloid.

Immuna a nabigbig iti publiko ti Yohimbine idi 1980 kas resulta ti naistrikto a panangtengngel ti panagadal babaen dagiti nagsukisok iti Queen's University Medical School idiay Canada. Napaneknekan iti panagadalda a makatulong ti yohimbine iti panangisubli ti potency iti diabetics ken kadagiti heart patients.

Ti yohimbine ket napigpigsa ngem iti Muira Puama ken Damiana, ngem ti side effects daytoy ti agbalin nga impractical ti pannakausarna. Tumulong ti yohimbine iti panagtangken ti mabagbagi ti lalaki, ngem dida ammo ti aramidenda no kasta a nakatangkenen.

Maaramat laeng ti yohimbine babaen iti panangiturong ken superbision ti maysa a doktor. Saan a maaramat no adda kidney disease, high blood pressure wenno psychological problems.

Ti epektona: ngumato ti presion ti dara ken heart rate, nausea, stomach pain, diarrhea, panagulaw, pagsakit iti ulo, skin flushing, hallucinations [panagam-amangaw], panagatake ti anxiety, ken panic attacks.

Saan nga ipauneg ti yohimbine iti taraon wenno substansia nga addaan iti tyramine, maysa nga amino acid; wenno iti liver, cheese, red wine ken decongestants-- ta no aramidem iti kasta, ngumato ti presion ti dara.*

[Adda tuloyna]