Lapdan ti Bitamina D ti Panagtaud ti Kanser Kadagiti Nataengan a Babbai

Dadduma Pay...

[Nabulod laeng ti ladawan a naaramat]

Lapdan ti Bitamina D ti Panagtaud ti Kanser Kadagiti Nataengan a Babbai
Ni Rudy Ram. Rumbaoa

ITI kaudian a panagadal/panagsukimat a naisayangkay itay kallabes, naduktalan a kissayan ti Bitamina D iti panagtaud ti adu a kita ti kanser manipud iti 60 a porsiento kadagiti natengan a babbai.

Ket pudno, pinatibker ti baro a panagadal ken duktal ti kaso ti sumagmamano nga espesialista nga addaan iti napigsa a pangontra iti kanser ti Bitamina D, ket maisingasing nga iyad-adu ti ipauneg iti daytoy [a bitamina].

Iti nasao a pannakaduktal, "Maysa a breakthrough iti benneg ti medisina ken ti kinaimportante daytoy iti pampubliko a salun-at," kuna ni Cedric Garland, mabigbig a mangad-adal iti Bitamina D idiay Unibersidad ti California- San Diego.

"Awan pay sabali a wagas a naduktalan a pananglapped iti kanser malaksid laeng iti daytoy. Dakkel ti apektona,' innayon ni Garland.

Kaaduan kadagiti dadduma a panagadal, makuna a naupay dagitoy nga espesialista iti nagbalin a resultana. Ngem iti kaudian a panagadal, nadesenio daytoy no kasano a makatulong ti Calcium ken Bitamina D iti salun-at dagiti tultulang. Naaramat ti aglimapulo a pasiente a pakaipakatan ti panagadal, sumagmamano kadagitoy ti agsagsagaba iti kanser a sakit.

Ti kudil a maipalag iti "ultraviolet rays" ti init, itdenna ti Bitamina D. Daytoy a porma ti panagadal ket naaramat iti kaingasna a klase ti bitamina a maawagan iti "D3" wenno "Cholecalciferol." Kargaen ti kaaduan a multivitamins ti nakapkapsut a klase ti bitamina nga awaganda iti "D2," ngem ti D3, kabaelanna nga itakderan wenno awiten nga agmaymaysa ti suplimento iti taraon.

Kadagiti immun-una a panagadal ken panagsukimat, naduktalan a tumulong ti Bitamina D a mangurnos ken timbengen ti panagdakkel dagiti selula, maysa a "fundamental biological" a pannaka-proseso tapno lappedanna ti panagtaud ti kanser. Kaaduan kadagiti dadduma a suplimento ti bitamina kas iti "Selenium" ken "Bitamina D" ti nairanta para iti nagduduma a klase ti sakit kas iti Prostrate Cancer.

Daytoy a panagadal isut' kaunaan a nangted ti balligi kadagiti nagisayangkat iti panagsukisok iti pannakarukod ti blood levels iti Bitamina D, nga uray dakkel ti naibukbok a panawenda iti daytoy, adu ti imbunga a pagsayaatan kadagiti naaramat a tattao iti daytoy a panagadal.

Iti sabali a bangir, inaramat dagiti researchers ti Creighton University idiay Omaha ti agarup 1, 179 a nasalun-at a babbai nga agtawen iti 67 para iti daytoy a panagadal. Nabingay dagiti babbai iti tallo a grupo: 446 ti addaan iti calcium ken vitamin D3 a suplimento, idinto nga agpadpada met a bilang dagiti babbai ti addaan iti kakaisuna a calcium, ken agarup 288 ti bilang ti dadduma ti nagipauneg iti "dummy pills."

Inted dagiti nagadal ti 1,000 daily international units ti Bitamina D, nasursuok ngem iti agdama a pagalagadan ti 200 agingga iti 600 units, depende iti tawen ti tao. Kangrunaan a kitaen dagiti nagadal iti daytoy epekto ti calcium ket iti salun-at ti tulang.