Maikabassit ti pannakaaramat ti painkillers no dumngeg iti musika sakbay ken kalpasan ti operasion

[Nabulod laeng ti ladawan a naaramat]

Maikabassit ti pannakaaramat ti painkillers no dumngeg iti musika sakbay ken kalpasan ti operasion

Ni Rudy Ram. Rumbaoa

LONDON [Reuters]- Kuna dagiti Briton a sientista nga iti panagdengngeg ti musika sakbay, bayat, ken kalpasan ti operasion ket maikkatan iti ut-ot a sagabaen ti maysa a pasiente, makarikna iti komportable/awan karigatrigat ken  maikabassit ti pannakaaramat ti medisina a pangpatay iti ut-ot [painkillers].

Kalpasan ti pannakarepaso ti ebidensia ti agarup 7,000 a pasiente, kuna dagiti sientista a mapalubosan dagiti pasiente a mangpili ti musika a kayatda a denggen sakbay nga agdalan iti operasion. 

Ngem nagballaag met la dagitoy a sientista a saan koma a lapdan wenno pakibiangan ti musika ti komunikasion ti medical team bayat iti pannakaisayangkat ti operasion.

Inlawlawag ni Catherine Meads manipud iti Brunei Universitiy ken maysa kadagiti nangidaulo iti panagsukisok, "Natalged ti musika, non-invasive, kalakaan a panangibalballaet/wenno proseso ti panangibabaet a rumbeng la koma ken sisasagana a maipaay iti asino man nga agdalan iti operasion."

Dagiti sientista ti nangisayangkat ti meta-analysis iti amin a naipablaak a randomized trials [wenno awanan iti partikular a panggep ti pammadasan/ispesipiko a gandat] tapno makita no kasano a maikompera ti musika iti gagangay a pannakataming ti pasiente [standard care] wenno iti saan a pannakaaramat ti medisina a maiballaet kas iti panangmasahe ken panangliwliwa no adda maitulongna iti alisto a panaglaing ti mays a tao nga agdalan iti operasion.

Iti resulta ti panagadal a naipablaak iti The Lancet Journal, naduktalan a mainanaan, awan unay pagrigatan/pagparikutan dagiti pasiente kalpasan ti operasion. Nairakurak pay ti pannakapnek [dagitoy a pasiente] iti panagdengngegda ti musika kalpasan ti operasion. Iti ababa a pannao, naalay-ayan ti rikna dagitoy iti panagdandanagda. Nainanaan, komportable, relaks.

Kuna pay dagiti nagadal a saan unay a masapul ti medisina a para ut-ot ken nairakurak a naiyababa wenno naipabassit ti ut-ot a marikna dagiti pasiente no maikompera a naited kadakuada ti medisina a mangtengngel ti panagut-ot.

Kuna dagiti sientista a nasamay ken epektibo para kadagiti pasiente ti agdengngeg iti musika uray ana nga oras wenno tiempo sakbay ken bayat [ti operasion] ta ipaay/iturongna ti napintas a panagdur-as kalpasan ti operasion.

Inako ni Martin Hirsch iti Queen Mary University of London ken maysa kadagiti nangidaulo ti panagadal, "Naaramaten daytoy a teknik/wagas uray pay idi panawen ni Florence Nightingale. Adda positibo a pagsayaatan/resulta ti agdengngeg iti musika bayat iti pannakaisayangkat ti operasion- ta pagkalmaenna ti rikna ken ikabassitna ti pannakarikna ti ut-ot. Nupay kasta, saggaysa a madutdot dagitoy a duktal tapno agtultuloy a maadal a nasayaat."

"Nalawag ti resulta ken klaro ti mensahe ti panagadal," inlawlawag met ni Paul Glasziou iti Australia Bond University, iti komento a sinuratna iti The Lancet Journal.  "Musika ti kasimplian ken kalakaan a maiballaet," 

Plano ita dagiti sientista a nagadal nga iyam-ammo daytoy a teknik iti The Royal London Hospital kadagiti babbai nga agdalan iti Caesarian sections ken addaan iti hysteroscopy.