Importante ti Makaanay a Turog

IMPORTANTE TI MAKAANAY A TUROG ni Rudy Ram. Rumbaoa [nabulod laeng ti ladawan a naaramat. maysa a buya ti saan a pannakaturog] Ne kadagiti agtartrabaho iti rabii wenno graveyard, basaenyo daytoy: "No ti tao a bassit ti turogna: ad-adu ti tiansada nga agbalin a nalukmeg wenno obesity, makaala iti sakit ti puso, nangato a presion ti dara ken diabetes..." KANAYONKA kadi a mabarbaringkuas iti rabii, wenno adda kadi problema iti pannnaturogmo, wenno dika kadi makaturog nga insigida? No agpayso man nga addaanka ti maysa kadagitoy a parikut, maysaka ngarud kadagiti maibilang nga agarup 50-70 a milion nga Amerikano nga agsagsagaba iti "sleep disorder." "Bassit a pannaturog wenno saan a makaanay a panangisubli ti turog [restorative sleep] ket maapektaran no kasano ti intay panagpanunot, no kasanotayo nga agtignay, no kasanotayo a lagipen dagiti napalabas, ken no kasano a maaramid ti trabahotayo iti pagopisinaan, iti eskuela wenno sadinno a pagtrabahoan," daytoy ti nabuddak a palawag ni Dr. Merrill Mitler, program director for sleep research ti National Institute of Neurological Disorders and Stroke [NINDS]. Ti agtultuloy a kaawan ti turog ket itundanatayo pay iti risgo ti saan a naurnos a rikna/tignay a kas iti dipresion ken mangitunda iti nakapuy/nakapsut a konsentrasion kasta met iti nakapuy a panangikeddeng, problema pang-sosial, al-alisto a pannakadesgrasia, ken ti panagngato ti bilang ti panagabuso. Adda met makuna a "di makita a rason iti biang ti pannaturog." Gapu iti mayoras a pannaturog ket mabalin met a maigapu daytoy kadagiti kemikal a reaksion iti nagduduma a paset ti bagi. Nailawlawag pay nga adda pakainaigan daytoy iti salun-at iti adu a panagpanpanunun a wagas. No dagitoy a kemikal reaksion ket saan nga agkakasurotan, maysa pay daytoy a kontribusion iti problema iti metaboliko ken iti cardiovascular system ket daytoy ti ad-adda a mangsupusop iti parikut. Kadagiti panagadal a naduktalan, "No ti tao a bassit ti turogna: ad-adu ti tiansada nga agbalin a nalukmeg wenno obesity, makaala iti sakit ti puso, nangato a presion ti dara ken diabetes." Mano ngarud ti kasapulantayo nga oras iti pannaturog? Dagiti nataengan, kadawyan a kasapulanda ti 7 agingga iti 8 nga oras a pannaturog iti tunggal rabii tapno marikna ti naan-anay nga inana no dagitoy ket makariing. Ngem no mariknam wenno maekspiriensa ti sobra a pannaturog iti aldaw wenno addaanka iti problema iti pannaturog, nasken a kasarita ti doktor wenno iti maysa a sleep therapist tapno mabalakadandaka iti parikutmo. Adtoy ti sumagmamano a pammalakad wenno singasing tapno magun-od ti makaanay a turog: -Aywanan ti regular a pannaturog ken ti nainsigudan nga oras a panagriing. -Liklikan ti caffaine ken sigarilio iti naladaw a paset ti malem, saan nga uminum iti alkohol tapno laeng matulongannaka a makaturog. -Liklikan ti maturog a sibubussog wenno awan nagyan ti tian. -Aramaten ti pagiddaan a para laeng iti pannaturog. Maturogka iti nasipnget, naulimek ken kaustoanna nga espasio nga addaan iti apagisu a temperatura. -Ag-relax sakbay a maturog. Agdigus iti napudot a danum, agdengngeg kadagiti makapaturog a musika, meditasion ken breathing excercise. -Iyadayo ti pagorasan iti katre tapno maliklikan iti patinayon a panangkita ti oras. -No dika makaturog iti uneg ti beinte minutos a panaguldag iti katre wenno nasapaka a nagriing ket dikan makaturog, bumangonka ket padasen ti ag-relax kas iti panagbasa agingga a maala ti turogmo manen. -Regular a panagwatwat ket makatulong met iti sumagmamano a kaso ti sleep disorders. Nupay kasta, saanka nga agwatwat iti dua nga oras sakbay iti pannaturog. -Liklikan ti adu unay a trabaho, paperwork wenno dagiti di mapugsat nga aktibidad iti dua nga oras sakbay ti pannaturog. Kadagiti magatang nga over-the-counter wenno prescription sleep aids, makatulong dagitoy nga agas iti apagbiit laeng a tiempo babaen met laeng iti pammalubos ti doktor. Sumagmamano met kadagiti sleep aids ti mangted iti panagulaw kabayatan iti aldaw a panangipauneg gapu iti epektona wenno side effects.*