Panagireseta dagiti Doktor iti High-Dose Acetaminophen, pinasardeng ti FDA

[Nabulod laeng ti ladawan a naaramat. Binaliwan ti FDA nga insurat ti opioid narcotics labels tapno mapaigetan ti pannakausarna para iti ut-ot]

Panagireseta dagiti Doktor iti High-Dose Acetaminophen, pinasardeng ti FDA

ni Rudy Ram. Rumbaoa

BINILIN ti Food and Drug Administration [FDA] dagiti doktor, dentista, farmasista ken dadduma pay a propesional a mangas-asistir iti salun-at iti panangisardengda a mangireseta wenno mangted kadagiti pasiente ti nangato a dosis [wenno kaadu kas iti kaadu ti rekomendado a droga para iti maysa a sakit] ti acetaminophen, ti aktibo a ramen/sangkap ti nalatak a pain-reliever Tylenol.

Dagiti pildoras, kapsula, tableta, syrups ken dadduma pay a kita ti pormulasion nga addaan iti nasurok a 325 miligrams a laonen ti acetaminophen a saan a mangipakita iti pannakaikabassit ti ut-ot, nasaysayaat a maikabassit ti dosis ti nasao nga agas; nupay kasta, inlawlawag ti FDA a madangran ti dalem no nangato unay ti lebel ti agas.

Kuna ti FDA a masapul a tawagan nga umuna ti farmasista ti doktor wenno dentista a nangireseta iti agas iti nangatngato ngem ti 325 miligrams ti acetaminophen no nasken a maibaba wenno maikabassit ti agas sakbay a maited wenno ipauneg ti pasiente.

Kasta met a binallaagan ti FDA dagiti konsumer wenno agus-usar gapu iti risgo nga itden ti inadvertent [wenno di naplano] overdoses ti acetaminophen, a masansan a mapasamak no agsasaruno nga ipauneg ti maysa a pasiente ti droga nga adda linaonna a painkiller. Ti mangyababa ti kangatuan/kaaduan a dosis ti acetaminophen ti manamnama a mangikabassit iti risgo ti di inggagara nga overdose wenno sobra a panagtomar iti agas nupay ti naireseta ti nganngani kagudua ti nairaman iti prescription medication kadagupan iti amin nga adda pakainaigan ti kaso, inlawlawag ti FDA.

Dagiti pasiente a sobra iti acetaminophen iti sistema/uneg ti bagi ti agsagaba/agsardeng iti panagtrabaho ti dalem gapu ta ti nasao nga organo ti akinresponsibilidad iti panagbalbaliw wenno pannakarunaw ti agas. Ket bunga ti panagsagaba/panagsardeng ti dalem nga agtrabaho, kasapulan ti pasiente ti madagdagus a liver transplant wenno agresulta pay iti pannakatay no baybay-an daytoy.

Iti pangilawlawag ti Harvard Medical School's Family Health Guide a maburakburak wenno mawarawara ti kaaduan nga acetaminophen iti substansia a saan a makaited iti peligro babaen iti pannakaiyisbo. Ngem uray pay bassit a porsiento ti maipatarus iti dua a banag [compound], makadadaelda latta iti selula.

Naammuan ti nagan ti compound babaen iti acronym NAPOL, ken addaan iti kombinasion nga antioxidant a managan iti glutathione tapno agbalin a natalged ti agas a maipauneg. Ngem iti kaso a sobra a dosis, awan ti makaanay a glutathione a tumulong iti NAPOL isut' gapuna a mairisgo ti dalem.

Itay napalabas a tallo a tawen, kiniddaw ti FDA regulators dagiti agparpartuat iti agas nga agboluntario a mangibaba iti bilang wenno ramen ti acetaminophen kadagiti napigsa nga agas a kas iti Percocet ken Vicodin nga agpada met laeng nga adda nailaok nga apiang ken/wenno dadduma pay a painkilers. Kaugalian nga iriseta dagiti doktor ken dentista daytoy a klase ti agas kadagiti pasiente nga agdalan iti operasion, pannakataming ti serioso a sugat wenno dental procedures.

Nalatak ti acetaminophen iti over-the-counter kadagiti farmasia wenno drug store. Agpada ti Tylenol ken ti generic versions ti maar-aramat a mangagas iti ut-ot ken gurigor, ken kaaduan pay kadagitoy ti naitipon iti para uyek ken panateng a medisina. Dagiti dadduma nga agas nga addaan iti acetaminophen a magatang iti over-the-counter kas koma iti Benadryl, Excedrin, Nyqul, Robitussin, Theraflu ken Vicks.