Ti Hormones a kas Aprodisiak [Maudi iti Lima a Paset]

[Nabulod laeng ti ladawan a naaramat iti artikulo]

Ti Hormones a kas Aprodisiak
[Maudi iti Lima a Paset]
Ni Rudy Ram. Rumbaoa


Ti Estrogen
-masansan a pagkamailian daytoy a kangrunaan a female hormone. Kinaagpaysona, saan a hormone ti estrogen, ngem maysa a klase ti hormones.

Ti estrogen ket maysa a hormone a pakaigapuan ti estrus [ploriperasion ti selula iti diding ti aanakan tapno maisagana ti panagsikog]. Ipagarup dagiti sientista a daytoy ti kakaisuna a hormone a naaramid ket naipanagan iti estrogen. Ita, ammotayo nga adda tallo: estrogen, estradiol ken estriol. Dagiti immuna a dua ket potent [mannakabalin] estrogens ken ti estriol ket isu ti kakapsutan.

Ti Produksion ti Estrogens
-mapataud ti estrogens iti ovaries [aanakan], adrenal glands ken iti placenta iti main-inaw a fetus. Agpataudda pay iti taba ken selula iti piskel, uray pay iti kalpasan ti menopause, no agsardengen ti obario nga agpataud iti estrogens. Isu't gapuna a dagiti nalulukmeg a babbai ti masansan nga addaan iti nangato nga estrogen levels kalpasan ti menopause.

Mannakabalin a kemikal ti estrogens [ken hormones] a kasapulan ti bagi tapno agparuar iti tubbog. Iti intero a panagbiag ti maysa a babai, makapataud iti dua a kutsara nga estrogen ken progesterone. Kas met iti panagpataud iti testosterone, ti produksion ti estrogen ket tengnglen ti hypothalamus iti utek.

Phytoestrogens ken Xenoestrogens
Kadagiti naglabas a tawtawen, nadiskobre dagiti agsuksukisok ti kemikal iti mula ken pulyosion iti aglawlaw nga agakem a kasla estrogens no makastrekda iti bagi. Dagitoy ti maaw-awagan iti "phytoestrogens" ti estrogen iti mula ken ti "xenoestrogens" ti kemikal iti aglawlaw nga agakem a kasla estrogens. Kamaudianna, adda sintetiko ken natural nga estrogens a produksion manipud iti kompania ti parmaseutika a magatang babaen iti ireseta ti doktor.

Ti Phytoestrogens
-kaustoan ti aksion ti estrogen ken mausar daytoy para kadagiti menopausal symptoms. Ti paggapuanna: tropical wild yams [dioscorea], soybeans, natnateng [cabbage family] ken iti herbal a dong quai ken black cohosh.

Ti Xenoestrogens
-masansan a masarakan daytoy a produkto ken byproduct manipud iti petrochemicals kas iti fuel oil, heating oil, pesticides, herbicides, plastics ken dioxins. Sumagmamano kadagitoy ti mannakabalin ti aksionna, nabileg kas iti toxic. Adda dagiti panagsukisok a maipagarup nga itdenna a komplikasion iti suso, aanakan, kanser iti bukelbukel [testes], infertility, nababa a bilang ti sperm ken ferminization iti lalaki.

Kaaduan a breast cancer ket agdependarda iti estrogen. Daytoy ti gapuna a saan a pagduaduaan ti panagsuspetsa iti kaadda ti breast cancer ta mabalin a naggapu daytoy iti pulosyon ti aglawlaw nga agakem a kasla estrogens no sumrek iti bagi.

Daytoy ti rason a masapul a madalusan ti aglawlaw nangruna ti kaadda ti petrochemical byproducts.

Kasano nga apektaran ti Estrogen iti panagdur-as ti seksual iti babai?
-makita a kasla awan ti napigsa nga impluensia ti estrogen iti seksual a tarigagay ken sungbat ti babai, wenno maikkat ti aanakan [ditoy nga agsardeng ti panagpataud iti estrogen] ket awan ti pagbaliwan iti panangimaneho ti seks ti babai. Nupay kasta, paalistuen ti estrogen ti pisikal nga aspeto ti pannakinaig babaen iti panangmentenar ti kondision ti diding ti mabagbagi ti babai- mapaadda ti vaginal lubrication wenno panagbabasa ti oki ken mapreserba ti panagbennat iti vagina.

Kasano nga apektaran ti panagbaba ti bilang ti estrogen iti seksual a tarigagay?
-ti rapido a panagbaba ti hormones ti kakannayon a panag-menopause ti mabalin a pakaigappuan iti myriad ti pisikal ken emosional a problema a mangipawil ti seks.

Ti panagbaba iti bilang ti estrogen ket ibabana ti rasion a dara nga agturong iti mabagbagi [oki] ti babai ken iti aglawlawna. Daytoy ti pakaigappuan ti diding iti vagina nga umingpis ken namaga, saan a makapataud iti lubricating secretions sakbay ken bayat ti pannakiseks. Agparang ti birri ken panagungap iti diding ti mabagbagi [oki] ti babai.

Ti kaadda ti vaginal impeksion kas iti trichomonal vaginitis ken pelvic disease ti mangpaalisto ti pannakapukaw ti estrogen. Lumned ti mabagbagi [oki] ti babai. Mapukaw ti panagbennat ken tono a paggapuan a di marikna a husto iti agpada a lalaki ken babai ti seks. In-inut a mapukaw ti genital tissues ti taba ken moisture. Agbaliw dagitoy a tissues, kasta met ti nababa a hormone levels ti maipagarup nga adda koneksionna a pisikal iti panagbaba ti tarigagay ti seks. Agbaliw ti linabag ken bumassit ti rukod ti suso. Tumaud ti problema iti bladder ket mabalin a pagamkan ti incontinence [wenno di materred a panagisbo/panangibleng]. Mapukaw ti sigud a kadakkel ti piskel ket umadu iti maideposito a taba, nangruna iti patong. Makarikna ti bara iti kudil a pakaigappuan ti di makaidna ken no dadduma, kasta unay a ling-et.

Kannayon a problema iti pisikal, ti pannakapukaw iti hormones ti mabalin a mangyeg ti emosional a distress- insomnia, anxiety, iritable, agbaliw a rikna, dipresion.

Agpataud kadi dagiti lallaki iti Estogen?
-mabalin nga agpataud dagiti lallaki iti estrogen, ngem bassit, ti gapuna ti estrogen levels-da ket nababbaba ngem dagiti babbai, idinto ti testosterone levels-da ket nangato nga amang. Dagiti nataengan a lallaki ti makapataud iti ad-adu nga estrogen no ikumpara kadagiti postmenopausal a babbai. Maipagarup a makatulong ti estrogen a mangproteher kontra iti Alzheimer's disease. Apagkatlo a daras kadagiti nataengan a babbai iti lallaki ti makapataud iti Alzheimer's. Mamati dagiti dadduma a nagsukisok ti nangato a level iti estrogen kadagiti nataengan a lallaki ti makagapu.

Kasapulan kadi dagiti lallaki iti suplimento ti Estrogen?
-agpataud dagiti lallaki iti estrogen ken progesteron kasta met kadagiti babbai iti testosterone. Ti level dagiti lallaki iti hormones ti babai ket saan nga agbaba ti bilang no edad ti pagsasaritaan, ken saan a kasapulan ti lalaki ti suplimento.

Ti Progesterone
-ti progesterone ken estrogen ket iladawanna ti hormones ti babai. Nupay adda tallo a klase ti estrogens, maymaysa laeng ti progesterone. Ti nagan naadaw manipud iti "pro" ken "gesterone," kayatna a sawen "for gestation."Mapataud ti progesterone babaen iti narruay a danum iti placenta bayat ti panagsikog [gestation]. Mapataud pay iti adrenal glands ken copus luteum. Ti corpus luteum ket agririmmuok wenno agtitipon a selula iti akin-kannigid nga obario kalpasan a rummuar dagiti itlog. Dagitoy nga agririmmuok wenno agtitipon a selula ti agtubbog iti hormones no awan ti tumaud a panagsikog.

Kasano a maapektaran ti Progesterone iti seksualidad ti babai?
-agtrabaho ti progesterone iti estrogen ken pasiglatenda ti epektona. Saan a kas iti estrogen, maapektaran ti seksual a tarigagay ti babai. Mabalin nga apektaranna ti emosion, sumayaat ti marikna. Ti natural a progesterone ket arigna ti mild tranquilizer, mood-elevator, ken natural anti-depressant a mangital-o ti marikna a pagimbagan ti babai. No adu ti ipauneg, arigna ti anesthesia.*

Ti Hormones a kas Aprodisiak [Umuna iti Lima a Paset]

[Nabulod laeng ti ala a ladawan a naaramat iti artikulo iti Articles Web]

Ti Hormones a kas Aprodisiak

[Umuna iti Lima a Paset]

Ni Rudy Ram. Rumbaoa

ITI panagbiag ti maysa a tao, ti seksualidadna ket tengngel babaen iti hormones. Uray pay sakbay a nayanaktayo, agtrabahon dagiti hormones a mangtengngel iti panagdur-as ti seksualidadtayo. Daytoy ket kemistri ti hormones a mangidirekta ti panagdur-as dagiti sexual organs ken kalpasanna, agparang ti karakter ti seksual a kas iti panagtubo ti barbas kadagiti lallaki ken panagdakkel ti barukong dagiti babbai. Sugsogan ken timbengen dagiti hormones ti menstrual cycle. Partuatenda ti alimpatok ti seksual a tarigagay. Manggargarida. Italmegda. Agbalin nga agresibo wenno reseptibo ti ugali ti seksual. Dagitoy ti puersa iti likudan ti panangimaneho ti seks, isuda ti kangrunaan nga agsugsog ken mangtengngel ti seksual a tarigagay. Ket gapu iti daytoy, mangrugi ti kemistri ti ayat iti kemistri dagiti hormones.

Ti Bileg ti Hormones

ANIA kadi ti hormones? Apay nga agpataudda iti nabileg a panangtengngel iti biag ken seksualidadtayo? Kasano a malabanan ti bilegda a mangparugso ti seks ken mangpapigsa iti panangimaneho ti seks? 

Dagiti hormones ket mensahe a kemikal a kangrunaan nga aggapu manipud iti endocrine glands. Isuda ti mamagtignay iti endocrine system tapno matimbeng dagiti dadduma a selula ken organo ti bagi. Ibukbok ti endocrine glands dagiti tubbog a direkta iti pagayusan ti dara. Kas koma ti sex glands [ovaries ken testes], ti pituitary gland, ken ti thyroid [salsalamagi].

Iti sabali a bangir, ti exocrine glands ket saan nga agruar ti tubbog iti pagayusan ti dara ken saanda nga agpataud iti hormones. Ti salivary glands, sweat glands ken tear glands ti ehemplo ti exocrine glands.

Maibilang a mensahero dagiti hormones gapu ta isuda ti mamagtignay ti maysa a gland a mangtengngel ti aktibidad ti selula wenno organo manipud iti adayo. Kas koma no madanon ti babai ti panagbalasangna, paruk-atan dagiti ovaries-na ti sex hormones. Dagitoy nga ovarian hormones ti mangkalbit ti aktibidad ti sabali a parte ti bagi kas iti panagdakkel ti barukong [suso], panaglapad ti patong, ken ti pangtubo ti buok iti kilikili.

Kasano nga agtrabaho dagiti Hormones?

Iti simple a termino, kastoy ti panangyakar dagiti hormones: agparuar ti gland iti tubbog a hormone iti pagayusan ti dara. Nakaprograma ti hormone para iti espesipiko a targetna- no daytoy ket ti selula wenno organo ti bagi a timbengen ti gland. No maparuk-atanen, agpuligos ti hormone iti dara agingga a makapidut iti receptor cell iti targetna. No naaramiden ti panagkamang, agturong ti hormone iti receptor, ket ditoy nga idanonna ti mensahe- mensahe a mangkalbit ti reaksion iti target tissue.

Ti balikas a "hormone" ket naadaw manipud iti Greek a sao "hormon," kayatna a sawen, "ray-awen wenno parugsuen," kastoy ti iladawanna no ti hormone ket idanonna ti mensahe: "Ti target issue ket mangrugi nga agrugso iti aktibidad." Mabalin ti reaksion ket insigida wenno apagbiit laeng wenno at-atiddog pay ti kabayagna. Nabileg dagiti hormones ken maparuk-atanda iti bilang ti minuto laeng. Apektaran ti panagbaliwbaliw ti hormone levels ti bagi, panunot ken emosion.

Dagiti Klase ti Hormones

Naklase dagiti hormones iti dua a grupo, basar daytoy iti chemical structures:

>Steroids

>Peptides

Ti Steroids

-naaramid manipud iti kolesterol ken addaan iti pagdumaan a four-string structure. Sex hormones ket steroids. Ti hormones ti lalaki ket maawagan iti "androgens," no sadino ti "testosterone" ket aktibo. Ti hormones ti babai ket maawaganda iti estrogens ken progesterone. Kannayonna pay, ti DHEA [dehydoepiandrosterone] ket paset ti pamilia ti androgen, importante a sex hormone precursor a mabalin nga agbaliw iti sabali a sex hormones. Ti precursor ket maysa a substansia a mabalinna ti agbaliw iti sabali wenno ak-aktibo a substansia. Kas koma iti DHEA, usaren ti bagi daytoy tapno agpataud iti testosterone ken dadduma nga androgens wenno agpataud iti estrogens.

Ti androgens wenno hormones dagiti lallaki ti agparang nga akin-responsable ti panagrusgso ti seksual. Apektaranda nga agpadpada ti endocrine system nga agpataud iti hormones ken ti nervous system, isuda ti mangituray ti panunot ken emosion. Agpataud dagiti babbai iti androgens, ngem bassit laeng a bilang. Dagitoy a bilang a pataudenda ket esensial para iti pannakamentenar ti normal a seksual a tarigagay dagiti babbai.

Ti Peptides

-naaramid dagitoy iti amino acids ken nagsisilpoda kas kawar. Ti gastrointestinal hormones ken ti pituitary hormone oxytocin ket ehemplo ti peptides wenno maawaganda pay iti protein-derived hormones. Kumamang ti oxytocin iti seks, ayat ken romansa: marikna ti panagrugso babaen iti apros ken sumayaat ti rikna. Ngem kaaduanna a babaen ti apros ti mangparugso ti rikna. Iti agpada a panagsungbat iti apros ken ti rikna, adda pagkaarngian ti oxytocin iti endorphins. Italo-o ti oxytocin ti nabara a rikna, intimacy ken panagkawar nga agresulta iti nabilbileg a sexual love, nupay dina parugsuen ti panangimaneho ti seks iti bukodna a kabalinan. Karaman pay ti oxytocin iti reproduksion kas iti produksion ti kontroktiur iti aanakan bayat ti labor ken paaduenna ti panagayus ti gatas iti suso ti ina.

Ti Kemikal a kasinsin dagiti Hormones

Ti Neurotransmitters- ti sexual power dagiti hormones ket mayarngi iti sexual power ti neurotransmitters. Agkasinsin dagitoy. Adda sumagmamano a hormones ti agbalin a neurotransmitters ken vice versa. Kas koma iti norepinephrine. No agpataud iti nerve cells ken agbiahe iti dalan ti nerbio, maawagan iti neurotransmitter; no agpataud iti adrenal glands ken agbiahe iti pagayusan ti dara- daytoy ti hormone.

Ti Pheromones

-sabali pay a kasinsin ti hormones ti pheromones. Ti sex hormones ket isuda ti "nagannak" wenno paggapuan ti male ken female pheromones. Agbugi ti pheromones iti dua a wagas. Umuna, ti panagngato ti levels ti sex hormones no madanonan ti puberty nga agpataud iti pheromone. Maikadua, rasionan ti hormones ti nangbangen a kemikal ti pheromones. Mapataud ti pheromones manipud iti byproducts ti sex hormones a nagsisina babaen ti aksion ti enzymes ken bakteria iti kudil. Kas pagarigan, itarus ti male pheromones androstenol ken androstenon manipud iti male hormone progesterone wenno ti precursorna- ti DHEA. Agpataud ti female hormones progesterone ken ti estrogens ti kemikal a maipagarup a pheromones dagitoy.*

[Adda Tuloyna]

Tutot iti Puerta ti Babai

[Nabulod laeng ti ladawan a naaramat iti salaysay]

Tutot iti Puerta ti Babai
Ni Rudy Ram. Rumbaoa

NAIPAKITA babaen kadagiti panagpalutpot a masagepsep dagiti agruar [tutot] manipud iti aanakan ken iti akin-ngato a paset ti puerta ti babai. Daytoy ti gagangay ken agtultuloy nga agayus a rummuar manipud iti paset nga ilemlemmeng ti maysa a babai. Mabalin a tumaud ti pumuraw a tutot gapu iti kaadda ti sakit iti maysa kadagitoy a paset ket agtuloy daytoy bayat ti sumagmamano a lawas wenno bulan. Mabalin a tumaud dagitoy a tutot gapu iti sakit a managan iti "trichomonas vaginalis," a patauden ti maysa a bassit a sepsep a gagangay nga agnaed wenno masarakan iti uneg ti kimmot. Mabalin pay nga agtaud daytoy a panagtutot gapu kadagitoy a bambanag: panagpalteg dagiti organo nga adda iti uneg ti patong, pannakasinga ti panagtrabaho dagiti salsalamagi, pannakapigis, pannakasugat ken nalabit a panaglaylay dagiti organo gapu iti panagbaket wenno panagsardeng ti panagbinulan.

Kadagiti babbalasitang, mabalin a maigapu daytoy a panagtutot iti pannakasair dagiti pingping wenno akin-ruar a paset ti puerta. Mabalin a rumsua daytoy a kasasaad gapu iti narugit nga aruaten, tapok wennko mureng, igges wenno panagay-ayam. Mabalin a sumaruno iti daytoy ti impeksion gapu iti kaadda dagiti mikrobio a managan iti "staphylococcus" a kanayon nga adda iti kudil.

Saan koma a pagsiddaawan ti kaadda dagiti agparang a tutot nga agruar iti maysa a balasitang gapu iti kinaiget dagiti organo ken salsalamagi nga adda kadagiti paset ti ilemlemmengna. Kadawyan nga agpukaw met laeng daytoy iti nadaras. Adda met nga agparang nga agruar kadagiti dadduma a babbai iti tiempo ti "ovulation" wenno panagitlog. Saan a karkarna daytoy, ket saan met a pakakitaan iti kaadda ti maysa a sakit.

Maatap pay a mabalin nga aggapu ti sakit iti sakit met laeng a "gonoria" ti kaadda ti dumuyaw a tutot nga agruar a mapakuyogan iti kasla mauram a rikna [burning sensation] kadagiti nataengan a babbai. Maisingasing a maagasan koma daytoy iti kabiitan a panawen. Mabalin nga ipakita ti kinadaruy ken nadanum nga agruar ti kaadda ti "kanser" iti aanakan wenno puerta, ket mabalin met a maigapu ti napalet ken kasla nagarasawan iti bagas ti kolorna ti agruar a mapakuyogan iti bassit a dara iti kaadda ti sakit a trichomonas wenno sabali pay nga impeksion.

Kabayatan dagiti tawen a panaganak, manipud iti kinabalasitang agingga iti nasurok nga uppat a pulo a tawen- mabalin a rummuar dagiti impeksion kalpasan ti panaganak gapu ti pannakadangran ti puerta iti pannakayanak ti ubing. Malaksid no nasayaat ti pannakataripatona, mabalin nga agawaras dayta nga impeksion kadagiti sabsabali pay a paset ti aanakan ken nalabit nga agbalin a kanser. Kakuyog ti panagtutot, mabalin a marikna ti panaggagatel.

Maaramid koma ti naannad a panageksamen nangruna no adda dumuyaw a tutot gapu ta mabalin a maigapu daytoy iti gonoria. Kasta met a maeksamen ti dara amangan no adda ketdi sakit a sipilis.

Panangagas
Maeksamen ti tutot babaen ti panagaramat iti mikroskopio ken sabsabali pay nga alikamen a pangusisa. Dakkel ti magapuanan dagiti agas nga antibiotics/antibayotiko kadagiti kaaduan nga impeksion, agraman ti gonoria. Mairaman kadagitoy ti agas a "penicillin," 600, 00 a yunits ti mainyeksion iti inaldaw, wenno "terramaycin" a kapsula, 250 mg., mamitlo a tumilmon iti maysa nga aldaw. Mabalin met a mapasardeng ti impeksion a managan iti trichomonas babaen iti panagbuggo a maaramat ti suka [dua a kutsara a suka iti maysa nga apagkapat ti maysa a galon ti napudot a danum] iti maminsan wenno mamindua iti maysa nga aldaw. Kalpasan daytoy, maiselsel ti kalilia wenno tableta iti puerta. Napaneknekan pay a makatulong daytoy ti "Floraquin" [diiodohydroxinquin compound].

No nakaro ti panaggatel, mabalin a maaramat ti maysa a sapsapo a "sulfonamide cream" iti bigat ken iti rabii. Kadagiti bumabbaket, mabalin a maaramat dagiti kalilia nga addaan iti "stilbesterol" a maiselsel iti puerta iti maminsan wenno mamindua iti agmalem bayat ti uppat agingga iti walo a lawas.

Makatulong pay babaen ti panagaramat iti maysa a sapsapo nga addaan iti hormone nga "estrogen." Agpaay iti nakaro a panaggagatel ti ruangan ti aanakan, mabalin a maaramid ti pannaksinit babaen ti kuriente. Maisaruno iti daytoy ti panagbuggo ti suka iti tunggal rabii iti dua a lawas. Mainayon laeng ti dua a kutsara a suka iti napudot a danum nga apagkapat ti maysa a galon. Iti uray ania a napaut nga impeksion dagiti assawa a babbai, masapul met koma a maeksamen ti asawa a lalaki ken maagasan no adda kenkuana ti ania man a sakit.*