Tapno Malapdan iti Panagpukaw ti Tulang

[Nabulod laeng ti ladawan a naaramat]

Tapno Malapdan iti Panagpukaw ti Tulang
ni Rudy Ram. Rumbaoa


Dagiti Kangrunaan a Tulbek a Manglapped iti Panagpukaw ti Tulang

Kasarita ti doktor maipanggep iti Osteoporosis
-ipudno iti doktor no mamin-ano nga agipaunegka iti bitamina, calcium supplements ken dadduma pay a medikasion, kangrunaan ti amin, isalpika/isao ti agbalin a side effects ti tomarem.

-no karugrugim a nag-menopause, wenno addaanka ti problema iti uterus ken ovary sakbay ti "natural" a menopause, saludsoden iti doktor no mabalinka a masubok para iti bone-density.

-no agdama nga agus-usarka iti medikasion a mangproteher dagiti tulang, saludsoden no maipalubos iti blood ken urine testing a mabalin a pangammuan no makatulong met laeng ti agas a tumtomarem, ken amangan no kasapulam iti napigpigsa a medikasion.

-dika agnerbios kadagiti madamdamagmo maipanggep iti hormone therapy, bisphosphonates wenno sabsabali pay a pagsubok. Dika agalumiim wenno mabain. Damagen iti doktor no ania dagitoy.

-agdamag iti registered dietician maipapan ti reperensia a makatulong a manggun-od iti bone-density foods wenno makatulong nga agpili iti suplimento iti taraon nga ipaunegmo.

-no madanaganka iti pannakatukkol dagiti tulang gapu iti pannakatnagmo wenno panagwatwatmo, damagen iti doktor ti mabalin nga ibalakad ken maitulongna kenka.

-damagen iti doktor ti maipanggep iti bone-density testing ken bone-density protecting medicine no adda pakasaritaan ti pamiliam iti osteoporosis. No adda pakasaritaam iti nabayag a kaawan ti panagbinulan, malaksid iti panagsikog, nakapuy a panagipauneg iti calcium, no agdamaka a ma-chemotheray para iti kanser, no naipaayanka iti organ transplant, wenno nagusar iti long-term steroid medications para iti kondision ti lupus, arhthritis, asthma, ken skin conditions.

Ti Bitamina
-ipakita iti tunggal panagadal: Dagiti babbai nga addaan iti aglapunosan a kalsium ken bitamina D ti ad-adda a makagun-od ken mabenipisiaran iti nasalsalun-at a tulang ngem kadagiti saan a pulos
mangpadas nga agipauneg iti nasao a bitamina. Masarakan ken maawat dagitoy a taraon manipud iti dairy products, iti berde a natnateng kas iti kale ken broccoli, ken sabsabali pay a taraon kas iti salmon ken almonds--ken suplimento manipud iti multivitamins ken calcium chews. Kapintasan no makaipauneg ti maysa a tao iti calcium manipud 1,200 agingga iti 1,500 milligrams iti tunggal aldaw, ken 800 a yunits ti bitamina D iti inaldaw.

Agbalin nga aktibo
-ania man kadagitoy: magna, agtaray, agsala, weight lifting ken ania a klase nga aktibidad a mamagbalin dagiti tulang nga agbagkat iti nadagsen ti makatulong iti panagdakkel ti selula ti tulang.

Ikabassit/Isardeng dagitoy nga ipauneg
-No agsigarilio wenno agtabako, aginum iti nasanger-- nasaysayaat a putden wenno isardeng a mamimpinsan daytoy a bisio. Napimpintas ti panagsagepseg ti bagi iti kalsium.

Kasapulan ti pannakasubok
-No agdamaka nga ag-menopause wenno naglabesen, nasayaat no masubokka para iti bone-density wenno ti makuna a DEXA scan-- maysa daytoy a rayo-X a pagsubok iti patong ken gulugod/duri a dimo marikna iti ania man nga ut-ot. Maaramid ti umuna kalpasan a sumrek iti menopause period. No ti score ket 1-agingga iti 2.4, kayatna a sawen a mangrugin nga agpukaw ti tulang, no 2.5 wenno nangatngato, kayatna a sawen- osteoporosis.

Tumaren dagiti medisina iti husto nga oras
-no inresetaannaka ti doktor iti medisina a para osteoporosis, masapul a tungpalen ti oras a panagtomar. Dika agsadsadut.

-adda dagiti grupo ti agas a maawagan iti bisphosphonates ken sabsabali pay a medisina a ti akem dagitoy ket mangagas iti osteoporosis ken osteopenia ti maipauneg iti regular nga oras ken aldaw tapno agtrabaho a husto iti bagi apaman a maipaunegda. Uray agdamaka nga agtomtomar iti calcium wenno bitamina D, masapul latta nga ipaunegmo ida. Saludsoden iti doktor no kasapulan ti pagsubok iti dara wenno isbu tapno maammuan no makatulong met laeng dagiti agas nga ipaunegmo.

Ti ngay hormones?
-saan a para iti mabayag a sulosion. Mabalin a makaalaka iti sangkabassit a benepisio mainaig iti tulang iti kasukat ti hormone therapy a temporario a mangbang-ar ti simtomas ti menopause, ngem saan koma nga ibilang a long-term solution gapu ta mabalinna nga iyeg ti risgo iti salun-at.

Regular a pagsubok
-no regular nga agipapaunegka iti steroid medicines, wenno addaanka iti cancer ken transplant, agannad. Dagiti medisina karaman ti prednisone, ken sabsabali a steroids, chemotherapy drugs ken anti-injection drugs ti mangpaalisto iti panagpukaw ti tulang. Imprtanten ngarud iti regular a pagsubok.

Nakabutbuteng para kadatayo amin ti osteoporosis, ngem adun ti nagdur-asan ti medisina. Nasken laeng a maammuan ken aksionan tapno maital-o ti tsansa a maaddaan iti nasalun-at a tulang.

Ti Panagwatwat Ipaayna iti Napigpigsa a Tulang
Makatulong ti panagwatwat ken resistance training a mangbangon iti napigpigsa a tulang ken pagtalinaedenna ti bone mass nga addan kenka. Daytoy ket agpayso nangruna kadagiti babbai ta isuda ti alisto/nalaka a maakaran wenno matignay iti panagpukaw ti tulang. Tapno mapagtalinaed a napigsa ti tulang, aramiden met dagiti babbai iti weight bearing exercices kas iti pannagna, jogging ken jumping rope--ta dakkel ti epekto daytoy iti tulang. Para kadagiti saan a makaaramid iti high-impact exercise, makatulong iti susuop ti panagdalus iti arubayan.

Nupay kasta, nasaysayaat met laeng ti inaldaw a panagwatwat. Maaramid laeng ti resistance training iti tunggal sabali nga aldaw wenno mamitlo iti maysa a lawas. Ngem agdepende daytoy a work-out no ania dagiti mabalin a makaipawil kas koma iti exercise history ti babai, overall fitness ken dagsen. Makapagwatwat dagiti dadduma a babbai iti napapaut nga oras; dagiti dadduma, mangrugida iti bassibassit a minuto agingga a maikaadu.

Masapul met a konsultaren ti physical therapist wenno ti athletic trainer para iti husto a bilang ti dagsen ti work-out, ta agdepende daytoy met laeng iti indibidual nga agwatwat. No nagwatwatka iti sobra, ammom a nasakit ti bagim nangruna kadagiti susuopmo iti sumuno a bigat. Mangrugi iti kaustoan a dagsen a namnamaem a maaramidmo manipud iti 15 agingga iti 20 a panangulit-ulit.

Saan koma a gamden nga aramiden dagiti impact-loading exercises ta ad-adda a yegna ti ut-ot iti arthritis, nangruna iti patong ken mukod. Rumbeng nga annadan dagiti babbai daytoy a klase ti panagwatwat. Ketdi, ibilang ti nalawa a range of motion kas iti panaglangoy wenno panagbisekleta. Dagitoy a klase ti panagwatwat ti makatulong a mangpapigsa iti piskel ken pagtalinaedenna nga awan ti dagsen iti susuop nga agresulta iti nasalsalun-at a tulang.*

Ti Hormones a kas Aprodisiak [Maikapat iti Lima a Paset]

[Nabulod laeng ti ladawan a naaramat]

Ti Hormones a kas Aprodisiak
[Maikapat iti Lima a Paset]
Ni Rudy Ram. Rumbaoa 

Ti DHEA
-wenno dehydroepiandrosterone, maysa a hormone a patauden ti adrenal glands a mabalin a mangbaliw ti kasapulan iti sabali a hormones. Maysa daytoy nga androgen ken masansan nga agbaliw iti testosterone ken mabalin pay nga agbaliw a female hormones.

Iti sabali a bangir, agparang nga adda sabali nga akem ti DHEA. Patien a pasiglatenna ti immune system. No bumaba ti bilang ti DHEA, agparang ti simtomas ti panaglakay/panagbaket, karaman ditoy a bumaba ti libido.

Malapdan kadi ti kaadda ti DHEA dagiti simtomas ti nataengan? Uray ti patay wenno alisto a panagbaba ti DHEA? Awan pay ti makaammo ngem agparang a ti DHEA ket bio-marker. Kayatna a sawen, marukod ti level iti bagi no kasano ti kaadayo ti proseso ti panagprogreso ti nataengan.

Bayat ti kinaagtutubo, ti DHEA ti nawadwad a paggapuan ti steroid hormones iti bagi. Mapattapatta iti nagbaetan ti tawen a 25- 30, mangrugi a bumababa ti level ti DHEA iti 2 porsiento ti tunggal tawen. No madanon ti tawen 90, ti level ti DHEA iti indibidual ket agarup 5 a porsiento. Sakbay ti ipapatay, agbalinen a zero wenno awan ti level ti DHEA.

Kayatna kadi a sawen ti panagipauneg iti DHEA supplements ket kasupadi ti simtomas ti nataengan, pannakaisubli ti pigsa ti kinaagtutubo ken mangpagaget manen ti sex life? Adda namnama, ti sungbat ket mabalin a wen. Kas resulta, magatang ti DHEA supplements iti sadino man a lugar.

Asino ti mabalin nga agipauneg ti DHEA?
-masansan a saan a maisingasing nga ipauneg dagiti agtutubo ti DHEA malaksid no ibaga ti doktor. Ti etiketa a masarakan iti DHEA supplements ket ibagana no dadduma a saan nga usaren ti DHEA no nababbaba ti tawenmo ngem iti 40.

Kadagiti ordinario a pasamak, masapul a panunoten a naimbag no kasapulan nga usaren daytoy a suplimento a DHEA agingga a mangrugi a bumababa iti natural ti levels. Gapu ta ipangato ti DHEA ti levels ti testosterone ken estrogen, saan a rekomendado para iti asino man nga addaan iti klase ti kanser a hormone-dependent kas iti prostate cancer wenno breast cancer.

Ania dagiti kalintegan nga itden ti DHEA?
-maikalintegan nga itden ti DHEA ti benepisio iti testosterone ken estrogen- kalbiten ti DHEA ti panagpataud iti bassit a bilang ti testosterone wenno estrogen a mabalin a kasapulan nga isubli ti rikna ti kinaagtutubo.

Makuna, ti DHEA ket:
>pasiglatenna wenno isublina ti panangimaneho iti seks
>yaduna ti enerhia ken panangiturong
>pagimbagenna ti marikna
>ibabana ti stress
>labanananna ti pannakabannog ken dipresion
>puoranna ti taba
>padakkelenna ti piskel
>tumulong a mangpukaw ti taramidong
>tumulong iti "dry eye"
>padur-asenna ti lagip
>papigsaenna ti immune system
>lapdanna ti atake iti puso

Ania dagiti ebidensia a mangsuporta ti kalintegan ti DHEA a mangpasiglat iti seks?
-dagiti ebidensia ket kangrunaan nga anecdotal manipud iti doktor a nagireseta iti DHEA kasta metten kadagiti nagusar iti DHEA. Nairakurak a ngumato ti interes dagiti lallaki iti seks ken dimmur-as ti sex performance-da. Kadagiti dadduma a nataengan a lallaki a saan a tumangken ti boto/mabagbagida iti bigat ti nakaekspiriensa iti panagbaliw ti kinalalakida manipud nagipaunegda iti DHEA. Nairakurak met a dagiti babbai ket immadu ti libido nga amang no maikumpera kadagiti lalaki. Mabalin a maipagarup nga ipangatona ti DHEA ti testosterone levels iti babai no ikumpara iti lalaki nga addaanen iti nangato a testosterone levels.

Pasiglatenna ti pisikal nga aspeto ti seks, tratuen ti DHEA ti emosional nga aspeto. Mangted bang-ar iti rikna ti ragsak ken pagimbagan, labananna ti dipresion ken suktanna iti nakananama a kapanunotan. Amin dagitoy a positibo nga emosion ket kontribusion a kumamang iti aktibo ken pannakapnek a sex life.

Nasayaat kadi nga ipauneg dagiti babbai ti DHEA?
-segun iti clinical trials kadagiti babbai nga agtawen iti nasurok a 40, naipakita iti pagsubok nga uray pay 50 mg ti ipaunegda a DHEA iti tunggal aldaw [ti gagangay nga ipapauneg a dosage dagiti lallaki] ti ngumato ti testosterone levels laeng iti normal a salun-at iti ub-ubbing a babbai. Daytoy ket gapu iti agpada a testosterone ken DHEA levels ti babai ken lalaki.

Ti testosterone levels ti agtawen iti 40 a babai ket maipagarup a kagudua iti agtawen iti 20. Mangpataud ti problema no nangato unay a dosage ti DHEA. Naduktalan dagiti nagsukisok nga ipangato ti 300 mg oral dose ti crystalline ti DHEA ti testosterone levels a mangpataud iti epekto ti masculine kas koma iti panagtubo ti buok iti rupa ken ibabana/pabangagenna ti boses ti babai. Masansan a maipauneg laeng ti 25 mg para kadagiti babbai.

[Adda Tuloyna]

Ti Hormones a kas Aprodisiak [Maikadua iti Lima a Paset]

[Nabulod ti ala a ladawan manipud iti Articles Web]

Ti Hormones a kas Aprodisiak
[Maikadua iti Lima a Paset]

Ni Rudy Ram. Rumbaoa

Ti Hormones ken Panangimaneho ti Bagi iti Seks

ITI amin a mammals, ti panangimaneho ti bagi iti seks ket panangiturong ti hormones. Ngem nupay kasta, ti panangimanehotayo iti seks ket maisupadi iti maysa nga importante a respeto manipud kadagiti dadduma a mammals. Kaaduan a babbai a mammals ti agbalin a reseptibo iti seks ken aginnalada laeng bayat ti estrus, wenno pudot, iti mapili nga oras ti kada tawen. Agtugmok ti bara ti tiempoda babaen iti obolasion, ket ditoy a padakkelenna ti tsansa nga agsikog.

Iti sabali a bangir, agragsak ken imasen dagiti babbai ti pannakinaig iti ania man a tukad ti monthly ovulatory cycle, kasta met a kalpasan iti pannakaikkat ti aanakan wenno ti sumangbay a panagbinulan. Saan a kas kadagiti mammals, ti obolasion iti babai a tao ket saan a mamarkaan iti panagbaliw ti ugali wenno sabsabali a pagilasinan a nakadidillaw iti lallaki. Ngem ketdi, madeterminar dagiti lallaki ken babbai no daytoy ket kabalinanna ti agsikog iti ania nga aldaw. Saan a mawaswas wenno mabaliwan ti panangimaneho ti bagi iti seks. Saan nga agparang wenno pagpaadu iti ania man a kita ti panangimaneho ti bagi iti seks.

Kasano a Maapektaran ti Relasion ti Hormone Levels?
-No ti babai ket saan nga ag-ovulate, ti sex drive-na ket adda pay la sadiay, ngem saan nga agbaliw. Ngumato ken bumaba kas iti panagngato ken panagbaba ti sex hormones ti maysa nga indibidual. Agpayso daytoy iti agpada a lalaki ken babai. Ti panagsinnukat ti hormone levels ket direkta a pannakaitupak ti sex drive ken mabalin a mangperdi ti maysa a relasion no di mabigbig wenno maawatan ti makagapu. Ti panagngato ken panagbaba ti bilang ti hormones, kasta met iti interes ti pannakinaig. Natural ti panagngato ken panagbaba dagiti dalluyon ta maipadto daytoy segun iti cycle of seasons. Ti problema ket ditay mabigbig no ania ti mapaspasamak gapu ta saantayo a maawatan ti kemistri ti bagi. No mapukaw ti seks ti ganas, masansan a pabasolentayo ti partner wenno ti bukodtayo a bagi. Ngem kaaduan a kaso, pabasolentayo ketdi dagiti hormones-tayo.

Kasano a Maapektaran ti Hormone Levels ti Edad?
Ti Hormone levels ket kankanayon nga agbaliw--iti aldaw, lawas ken bulan ken uray iti tawen. Iti nagbaetan ti tawen a 25 ken 30, nangato ti levels ti hormone. Kalpasanna, mangrugi a bumaba babaen iti panangidaulo ti DHEA. Bumaba ti rate ti DHEA iti agarup 2 a porsiento ti tunggal tawen.

No mangrugin ti panagbaba, saantayo a mapakdaaran iti panagbalbaliw, ngem ketdi no madanonan ti katengngaan nga edad. Ket manipud ditoy, saantayo a maaramid dagiti banag nga inar-aramidtay idi. Saantayon a napigsa kas idi. Masansan ketdi ti pannakarikna ti alisto a pannakabannog. Mapukpukawen ti sex drive. Agbalitayo a flabby, mabalin a nalukmeg uray pay no kalikagumtayo ti agwatwat wenno agdiyeta.

No mangrugin ti panag-menopause ti babai, narigatdan a gargarien. Pumaspas ti panagbaba ti hormones-da. Ti apekto daytoy a pannakapukaw ti hormone iti sex life dagiti babbai ket mabalin nga agtennag iti nakaro. Kannayonna ti emotional distress, ti panagibus ti hormones ket pabassitenna ti tarigagay ti seks ken rugso. Agmaga, agingpis ti diding ti mabagbagi ti babai ket daytoy ti mangpataud iti naut-ot a pannakinaig.

Matengngel kadi ti Hormone Levels?
- no bumaba ti bilang ti hormones, yegda ti simtomas ti edad wenno nataengan [kinalakay/kinabaket]. Dakkel ti impluensia ti hormones iti biagtayo, ngem mabalin a matengngeltayo ti sumagmamano kadakuada.

Ti Diyeta ken Suplimento ti Taraon
-Saan nga agidulin ti bagi iti hormones, ngem kankanayon a mapunno/paaduen ken mapataud. Daytoy ti mangted kadatayo iti tsansa a sumrek ken apektaran ti hormone levels. Gapu ta ti hormones ket sintetiko babaen ti bagi manipud iti substansia a karaman iti taraon, mabalintayo nga yadu ti hormone levels nga aggapu iti taraon nga ipauneg ken babaen ti aggapu iti suplimento ti taraon.

Yababa/Ikkaten ti Stress
-Direkta a maimpluensiaan ti hormone levels babaen ti stress- agpada a pisikal ken emosion. Ket babaen iti panangyammo ti stress-reducing strategies iti biagtayo, mabalin a mabalanse ti hormone levels. Panagwatwat ken meditasion ti ehemplo ti natural stress-relieving strategies. Maysa pay ti pannakiseks. Kanayonna iti panangyababa/panangikkatg ti stress, ipangato ti seks ti levels ti sex hormones. Daytoy ti mangidalan ti tarigagay iti ad-adu nga aktibidad ti seksual. "Use it or lose it."

Panagwatwat
-ti panagwatwat iti regular, kayatna a sawen- nasaysayaat ti seks. Adda koneksion ti nagbaetan ti agbalin nga aktibo pisikal ken itag-ay ti enerhia ti seks. Kas iti panagwatwat, pumigsa ti seks.

Agpanunot iti positibo
-apektaran ti hormone levels saan laeng no ania ti aramidentayo, ngem karaman ditoy ti panagpanunot. Agpanunot iti positibo ti mangital-o ti bilang ti hormones. Pabassiten ti negatibo a panagpanunot. Ngem agpada a mangtengngel ti positibo ken negatibo a panunot ti hormones.

Hormone Supplimentation
-no kasapulan ti pannakibaet ti medikal, mangireseta ti maysa a doktor iti natural wenno sintetiko a hormone boosters. Sumagmamano kadagitoy nga hormone suppliments ket naaramid manipud iti phytochemicals [plant chemicals] ken magatang iti food stores. Magatang iti nagduduma a kita kas iti tableta, pildoras, creams ken suppositories.*

[Adda Tuloyna]

Ti Hormones a kas Aprodisiak [Umuna iti Lima a Paset]

[Nabulod laeng ti ala a ladawan a naaramat iti artikulo iti Articles Web]

Ti Hormones a kas Aprodisiak

[Umuna iti Lima a Paset]

Ni Rudy Ram. Rumbaoa

ITI panagbiag ti maysa a tao, ti seksualidadna ket tengngel babaen iti hormones. Uray pay sakbay a nayanaktayo, agtrabahon dagiti hormones a mangtengngel iti panagdur-as ti seksualidadtayo. Daytoy ket kemistri ti hormones a mangidirekta ti panagdur-as dagiti sexual organs ken kalpasanna, agparang ti karakter ti seksual a kas iti panagtubo ti barbas kadagiti lallaki ken panagdakkel ti barukong dagiti babbai. Sugsogan ken timbengen dagiti hormones ti menstrual cycle. Partuatenda ti alimpatok ti seksual a tarigagay. Manggargarida. Italmegda. Agbalin nga agresibo wenno reseptibo ti ugali ti seksual. Dagitoy ti puersa iti likudan ti panangimaneho ti seks, isuda ti kangrunaan nga agsugsog ken mangtengngel ti seksual a tarigagay. Ket gapu iti daytoy, mangrugi ti kemistri ti ayat iti kemistri dagiti hormones.

Ti Bileg ti Hormones

ANIA kadi ti hormones? Apay nga agpataudda iti nabileg a panangtengngel iti biag ken seksualidadtayo? Kasano a malabanan ti bilegda a mangparugso ti seks ken mangpapigsa iti panangimaneho ti seks? 

Dagiti hormones ket mensahe a kemikal a kangrunaan nga aggapu manipud iti endocrine glands. Isuda ti mamagtignay iti endocrine system tapno matimbeng dagiti dadduma a selula ken organo ti bagi. Ibukbok ti endocrine glands dagiti tubbog a direkta iti pagayusan ti dara. Kas koma ti sex glands [ovaries ken testes], ti pituitary gland, ken ti thyroid [salsalamagi].

Iti sabali a bangir, ti exocrine glands ket saan nga agruar ti tubbog iti pagayusan ti dara ken saanda nga agpataud iti hormones. Ti salivary glands, sweat glands ken tear glands ti ehemplo ti exocrine glands.

Maibilang a mensahero dagiti hormones gapu ta isuda ti mamagtignay ti maysa a gland a mangtengngel ti aktibidad ti selula wenno organo manipud iti adayo. Kas koma no madanon ti babai ti panagbalasangna, paruk-atan dagiti ovaries-na ti sex hormones. Dagitoy nga ovarian hormones ti mangkalbit ti aktibidad ti sabali a parte ti bagi kas iti panagdakkel ti barukong [suso], panaglapad ti patong, ken ti pangtubo ti buok iti kilikili.

Kasano nga agtrabaho dagiti Hormones?

Iti simple a termino, kastoy ti panangyakar dagiti hormones: agparuar ti gland iti tubbog a hormone iti pagayusan ti dara. Nakaprograma ti hormone para iti espesipiko a targetna- no daytoy ket ti selula wenno organo ti bagi a timbengen ti gland. No maparuk-atanen, agpuligos ti hormone iti dara agingga a makapidut iti receptor cell iti targetna. No naaramiden ti panagkamang, agturong ti hormone iti receptor, ket ditoy nga idanonna ti mensahe- mensahe a mangkalbit ti reaksion iti target tissue.

Ti balikas a "hormone" ket naadaw manipud iti Greek a sao "hormon," kayatna a sawen, "ray-awen wenno parugsuen," kastoy ti iladawanna no ti hormone ket idanonna ti mensahe: "Ti target issue ket mangrugi nga agrugso iti aktibidad." Mabalin ti reaksion ket insigida wenno apagbiit laeng wenno at-atiddog pay ti kabayagna. Nabileg dagiti hormones ken maparuk-atanda iti bilang ti minuto laeng. Apektaran ti panagbaliwbaliw ti hormone levels ti bagi, panunot ken emosion.

Dagiti Klase ti Hormones

Naklase dagiti hormones iti dua a grupo, basar daytoy iti chemical structures:

>Steroids

>Peptides

Ti Steroids

-naaramid manipud iti kolesterol ken addaan iti pagdumaan a four-string structure. Sex hormones ket steroids. Ti hormones ti lalaki ket maawagan iti "androgens," no sadino ti "testosterone" ket aktibo. Ti hormones ti babai ket maawaganda iti estrogens ken progesterone. Kannayonna pay, ti DHEA [dehydoepiandrosterone] ket paset ti pamilia ti androgen, importante a sex hormone precursor a mabalin nga agbaliw iti sabali a sex hormones. Ti precursor ket maysa a substansia a mabalinna ti agbaliw iti sabali wenno ak-aktibo a substansia. Kas koma iti DHEA, usaren ti bagi daytoy tapno agpataud iti testosterone ken dadduma nga androgens wenno agpataud iti estrogens.

Ti androgens wenno hormones dagiti lallaki ti agparang nga akin-responsable ti panagrusgso ti seksual. Apektaranda nga agpadpada ti endocrine system nga agpataud iti hormones ken ti nervous system, isuda ti mangituray ti panunot ken emosion. Agpataud dagiti babbai iti androgens, ngem bassit laeng a bilang. Dagitoy a bilang a pataudenda ket esensial para iti pannakamentenar ti normal a seksual a tarigagay dagiti babbai.

Ti Peptides

-naaramid dagitoy iti amino acids ken nagsisilpoda kas kawar. Ti gastrointestinal hormones ken ti pituitary hormone oxytocin ket ehemplo ti peptides wenno maawaganda pay iti protein-derived hormones. Kumamang ti oxytocin iti seks, ayat ken romansa: marikna ti panagrugso babaen iti apros ken sumayaat ti rikna. Ngem kaaduanna a babaen ti apros ti mangparugso ti rikna. Iti agpada a panagsungbat iti apros ken ti rikna, adda pagkaarngian ti oxytocin iti endorphins. Italo-o ti oxytocin ti nabara a rikna, intimacy ken panagkawar nga agresulta iti nabilbileg a sexual love, nupay dina parugsuen ti panangimaneho ti seks iti bukodna a kabalinan. Karaman pay ti oxytocin iti reproduksion kas iti produksion ti kontroktiur iti aanakan bayat ti labor ken paaduenna ti panagayus ti gatas iti suso ti ina.

Ti Kemikal a kasinsin dagiti Hormones

Ti Neurotransmitters- ti sexual power dagiti hormones ket mayarngi iti sexual power ti neurotransmitters. Agkasinsin dagitoy. Adda sumagmamano a hormones ti agbalin a neurotransmitters ken vice versa. Kas koma iti norepinephrine. No agpataud iti nerve cells ken agbiahe iti dalan ti nerbio, maawagan iti neurotransmitter; no agpataud iti adrenal glands ken agbiahe iti pagayusan ti dara- daytoy ti hormone.

Ti Pheromones

-sabali pay a kasinsin ti hormones ti pheromones. Ti sex hormones ket isuda ti "nagannak" wenno paggapuan ti male ken female pheromones. Agbugi ti pheromones iti dua a wagas. Umuna, ti panagngato ti levels ti sex hormones no madanonan ti puberty nga agpataud iti pheromone. Maikadua, rasionan ti hormones ti nangbangen a kemikal ti pheromones. Mapataud ti pheromones manipud iti byproducts ti sex hormones a nagsisina babaen ti aksion ti enzymes ken bakteria iti kudil. Kas pagarigan, itarus ti male pheromones androstenol ken androstenon manipud iti male hormone progesterone wenno ti precursorna- ti DHEA. Agpataud ti female hormones progesterone ken ti estrogens ti kemikal a maipagarup a pheromones dagitoy.*

[Adda Tuloyna]