Taraon, Salun-at ken Alimpatok

[Nabulod laenhg dagiti ladawan a naaramat iti salaysay]

Taraon, Salun-at ken Alimpatok [Maudi iti Dua a Paset]
ni Rudy Ram. Rumbaoa
Mabasa pay iti "Di Nakapappapati, Ngem Pudno" ti Fil-Am Observer August 2012 Issue, Opinion Section, Page 5

"Kannayon a mangibaba ti libido, patauden pay ti high-fat diet ti Atherosclerosis- ti panangbangen ken panagdeposito ti taba iti blood vessels, karaman dagiti babassit a blood vessels iti mabagbagi ti lalaki. No agilet dagiti blood vessels babaen ti plaque deposits, saan nga umisu ti rasion a dara a mapan iti mabagbagi ti lalaki ken saanna a magun-od ti panagtangken [ti boto], dida pay sumungbat iti senial ti pannakakagargari/seksual nga iturayan ti sex drive..."

 
Regular a Taraon [Nutrients] nga ipauneg para iti mabayag/napaut a pannakiseks

NADAKAMAT iti umuna a paset a dagitoy a taraon a pagparugso-pagpasiglat ket mapapati pay nga adda akemna a pampapigsa para iti napapanut a pannakainaig wenno pannakiseks. Adda met sabali a ramen ken sustansia ti taraon. Adda kina-espesial ken kina-importante ti esensial a fatty acids, ti bitamina B-Complex ken mineral. Adda met akem ti calories [wenno bilang ti enerhia manipud iti makan]. Dagitoy a kalori iti taraon ti mangipaay ti enerhia iti amin nga aktibidad nga aramidentayo iti inaldaw-aldaw- ket mairamanen ditoy ti seks.

Alaen ti kaustoan a bilang ti Kalori
-Saan a nasayaat ti anorexia [wenno ti pannakapukaw ti ganas a mangan]. Kas met kadagiti dadduma a napateg a kanito ti pisikal nga aktibidad, ti pannaki-sex ket kasapulanna ti calories- no mabalin, adu a calories. No agipauneg iti bassit a kalori, mapukaw ti tao iti panangimanehona ti seks [sex drive], a karaman ti timbangna. Uray pay no madanon ti kalikagum a physical goal, agresulta wenno agtennag a nabannog ken iritable ti rikna no makinaig. Saan a pangupay kadagiti tao daytoy gapu iti ayatda a palag-anen ti timbangda, ngem agannad iti insigida a panagbaba ti timbang iti low-calorie diet ta agresulta iti pannakadidigra ti taraon.

Ti kinaawan ganas a sumango iti panganan tapno mangan wenno ti kinasadut a mangtaraon ti boksit gapu iti bisin ket maysa daytoy a pangrippuog iti bukod a bagi. Ti sobra a timbang saanna a kayatna a sawen a bumaba ti sex appeal ti maysa a tao. Ngem ti sobra a timbang ket mabalin a saanna a matakderan ti wagas a pannakiseks, *pannakisipol wenno pannakiromansa; ketdi, apektaranna ti reproductive system ti bagi. Saan la a dayta, apektaranna pay ti pannakapataud ti sex hormones. Daytoy ket agpayso partikular kadagiti overweight a resulta ti high-fat diet.

Ti taba, agpataud iti Estrogen, ti kangrunaan a female hormone [ti *hormone ket maysa a substansia a mangpartuat iti maysa a banag a sibibiag tapno agbalin daytoy a kas motor ti panaggaraw]. Kadagiti babbai, ti panagurnong iti sobra nga estrogen ti mabalin a mangpataud iti saan a makaay-ayo a side effects, kas koma iti pannakaisturbo ti panagbinulan wenno panagbubussog ti tian. No saan, mairisgo pay daytoy iti panagtaud ti breast cancer gapu ta ti cancer ket "estrogen-dependent." Ngem maliklikan ti pannakairisgo iti nasao a sakit no ibaba ti bilang nga ipauneg a high-fat foods.

Kadagiti lallaki a managipauneg iti taraon nga addaan iti nangato a taba [high in fat] ti mangiturong ti bagi nga agpataud iti nababa a testosterone- *hormone dagiti lallaki nga akinresponsable ti sex drive.

Iti panagadal nga insayangkat ti University of Utah, nasubok ti epekto ti high fat iti testoterone levels iti walo a nagboluntario a lallaki. Pagsiddaawaan ti nagbalin a resulta ti panagadal. Kalpasan nga imminum dagitoy a lallaki iti high fat milkshakes [57% fat, 34% carbohydrates, 9% protein], bimmaba ti level ti testosterone iti agarup 50 a porsiento. Idi imminumda iti low-fat milkshakes [1% fat, 73% carbohydrates, 25% protein], saan a pulos a bimmaba wenno nakuti ti level ti testosterone da. Iti nagnguddoan ti panagadal, ibaba wenno pukawen ti high-fat diet ti sex drive ti lalaki. Inamongan dagiti dadduma a nagsukisok ken napaneknekkan kadagiti sabsabali pay a panagadal a naisayangkat daytoy a konklusionda.

Kannayon a mangibaba ti libido, patauden pay ti high-fat diet ti Atherosclerosis- ti panangbangen ken panagdeposito ti taba iti blood vessels, karaman dagiti babassit a blood vessels iti mabagbagi ti lalaki. No agilet dagiti blood vessels babaen ti plaque deposits, saan nga umisu ti rasion a dara a mapan iti mabagbagi ti lalaki ken saanna a magun-od ti panagtangken [ti boto], dida pay sumungbat iti senial ti pannakakagargari/seksual nga iturayan ti sex drive.

Ti diyeta a nangato ti ramenna iti Animal Fats; nangrunan dagiti taba a masarakan iti red meat, ti [mabalin a] mangapektar ti hormone levels dagiti agpada a lalaki ken babai. Masansan a mainayon ti female hormone iti karne a taraon kas iti beef cattle, ken no dadduma, ti karne ti manok tapno aglanga dagitoy a nalukmeg no mailako iti tiendaan. Ti female hormones ti mangpataud ti danum ken mangnayon iti dagsen ti timbang ti bagi.

Saanna met ngarud kayat a sawen a saan a mabalin nga agipauneg dagiti babbai iti taba para iti nasalsalun-at a hormones da. Ket no mapasamak dayta, yegna ti nakaro a perdision ti kudil. Mabalin met a lappedan iti panagipauneg ti Fat-Soluble Vitamins kas iti bitamina A, D, E ken K ti agbalin a perdision ti bagi. Masapul met bassit ti taba iti panagdiyeta, ngem masarakan dagitoy kadagiti berde a natnateng, iti nuts, bukbukel, ken lana ti lames. Karaman pay iti kangrunaan a taba iti Essential Fatty Acids.

Ti Essential Fatty Acids
-Masapul dagitoy a taba, ta esensial ngarud para iti bagi, ngem dida met mapataud/makapartuat iti bukodda a taba. Masapul ti regular a pannakarasion iti diyeta ta esensialda. Importante ti panagtrabaho ken serbi ti fatty acids kas iti panangpapigsa ti cell membranes, ital-ona ti panagdakkel dagiti piskel ken taba iti dara. Krusial met daytoy nga agserbi iti sex life ti tao. Kasapulan ti normal a panagtrabaho ti sex organs ken glands, mangpataud ti sex hormones ken adrenal hormones, parugsuenna ti produksion ti prostaglandis [maysa a substansia ti hormone a nasken tapno adda sexual response], padur-asenna ti sirkulasion tapno agayus ti dara iti genitals ken tumulong a mangpatangken iti mabagbagi ti lalaki.

Dua ti esensial nga akem ti fatty acids tapno agtrabaho a nasayaat. Dagitoy ti Linoleic Acid ken EPA [wenno Eicosapentaenoic Acid]. Kangrunaan a pakasarakan ken paggapuan ti Linoleic Acid ket iti cold-pressed oils ti berde a natnateng, bukel ken nuts. Kameng met ti EPA iti Omega-3 Group ti fatty acids a masarakan iti lana ti lames- kas iti salmon. Dakkel ti akem ti Omega-3 Fish Oils a mangibaba ti cholesterol ken blood fat levels. Ngarud, padur-asenna ti sirkulasion ken paingpisenna ti dara.

Agpada ti Linoleic Acid ken EPA nga agpataud/agpartuat iti prostaglandins- a kasapulan unay iti sexual response ken panangpatangken iti mabagbagi ti lalaki. Tapno mapaadda ti prostaglandins, kasapulan ti fatty acids iti umisu a rasion ti Bitamina B3, B6, Bitamina C, Zinc ken Magnesium.

Paggapuan/pakasarakan ti Linoleic Acid ket iti Safflowe oil, sunflower oil, evening promrose oil, black currat oil, soil oil, corn oil, sesame oil, walnuts, almonds, ken peanut butter. Agpataud met ti salmon, mackerel, menhaden, herring, sardines, ken flaxseed oil iti EPA Omega-3.

Saan a mabalin nga ipauneg ti EPA no agus-usar iti thinning-blood medication. No sobra ti panagusar iti EPA, ipabassitna ti abilidad ti dara nga agtitipkel. Maisingasing kadagiti diabetes nga agipauneg iti lames gapu iti esensial ti fatty acids, ngem liklikan ti agusar iti fish-oil suppliments.

Ti Vitamin B-Complex
-Naproseso a taraon ken [makuna] junk foods kadagiti fast-food chains ket nagbalinen nga inaldaw-aldaw a paset ti lifestyle ti tao no gumatang kadagitoy a taraon nga ipauneg. Ket nupay kombiniente, alisto ken nababa ti presio dagitoy a tagilako, nakurang met ti ipaayda a bitamin ken pagimbagan iti salun-at. Maysa kadagiti pagkurangan dagitoy a taraon iti tagilako isu ti Bitamina B. Ti whole grains ti kangrunaan a paggapuan ti B vitamins iti apagisu a diyeta. Ngem kaaduan kadagitoy a B vitamins ti maikkat no maproseso ti pannakaaramid ti puraw a tinapay. Ket no awan ti B vitamins, ti bread/tinapay ket saanen a makuna wenno maibilang a "paset ti taraon ti biag." Ngem adda met sabsabali pay a makagapu iti daytoy a pagkurangan ti B vitamins- kas koma iti edad [nataengan unayen ti tao a mangawat kadaytoy], ken/wenno problema iti salun-at.

No agkaurang iti ania man kadagiti B vitamins, nakakaimposible a magun-od ti alimpatok/panagganas a marikna wenno itden ti seks. Adda dua a mabalin a makagapu: no awan ti naan-anay nga "enerhia" ken sadut nga agtrabaho dagiti "nerbio," ta isuda ti mangtengngel ken mamaggaraw iti amin, no di pay tunggal aramid. Ta no awan ti B vitamins iti bagi, saanna a mabaliwan ti carbohydrates iti glucose- simple nga asukar iti bagi ken kangrunaan a paggapuan ti enerhia. Wenno saan marumrumek ti taba wenno proteins. Iti ababa a pannao, uray manganka, awan ti magun-od wenno mapataud nga enerhia manipud iti taraon nga ipaunegmo.

Agresulta pay ti panagkurang ti bitamina B iti kina-iritable uray iti punto ti kinaagresibo ken kinanerbios.

Malaksid no agipaunegka iti adu a wheat germ, whole grains, brewer's yeast wenno dalem, ngem kasla imposible a magun-od ti B vitamins iti mismo a taraon. Iti sabali a bangir, no agipaunegka iti suplimento ti single B vitamin, kasapulan a mayadu ti dadduma a bitamina B. Ti panagkurang ti maysa a B vitamins ti mangpataud iti panagkurang ti sabali. Ngarud masapul a balanse ti vitamin B-complex suppliment.

Ania ngay ti Mineral?
-Mangrugi kas minute particles, tay bassit sa in-inut nga agporma iti lana- ditoy a lumabas ti mineral. Manipud lana iti danum, manipud iti mula ken iti mula- dagiti animal, dagiti agipauneg iti agpada a mula ken karne ti animal.

Iti amin a taraon, ti mineral ti kangrunaan a kasapulan tapno agbiag. Mabalin nga agtrabaho ti bagi nga uray awan ti bitamina, ngem saan a mabalin ti mineral. Kasapulan pay ti bitamina iti kaadda ti mineral tapno agtrabaho a nasayaat daytoy. Kasapulan ti mineral iti isu amin a selula ti bagi ken ti proseso ti panagtrabaho ti bagi kas iti digestion [wenno panagngalngal iti makan tapno agbalin a babassit ken tapno naparpardas a marunaw] ken iti seks. No awan ti mineral iti uray laeng ti likido ti bagi, saan a makapataud/makapartuat iti kapsit ti lalaki. Dagitoy a minerals ket makuna a chemical catalysts tapno maaramid ti maysa a banag.

Dua ti grupo ti minerals. Umuna, adda makuna a "macro [bulk] minerals" a kasapulan para iti ad-adu a kuantidad: calcium, magnesium, sodium, potassium, phosphorous. Ti maikadua isu ti "micro [trace] minerals" a kasapulan para iti minuto a kuantidad: zinz, iron, copper, manganese, chromium, selenium ken iodine.

Mapan kadagiti tulang ken piskel dagiti sobra a minerals a maipauneg.

Kompleto ti panangsagepsep ti bagi iti minerals. No adu ti maipauneg a zinc- mabalinna a pukawen ti calcium ken copper. Ngarud saan a nasayaat no agipauneg iti maymaysa a klase ti mineral supplements malaksid no adda superbision ti health professional.

Magatang ti mineral iti porma ti chalated. Kayatna a sawen a nairaman iti protein a tumulong a masagepsep.